लोक समाचारदाता
मलंगवा, फागुन १७ गते ।
सर्लाहीको लालबन्दी नरगपालिका १ स्थित नवलपुर सर्पदंश उपचार केन्द्रको भेन्टिलेटर र आइसियु सेवा चिकित्सकको आभावमा प्रयोगविहीन भएको छ ।
दक्ष चिकित्सक नहुँदा उपकरण थन्किएर उपचार सेवा समेत प्रभावित बन्न पुगेको छ । प्रदेश नम्बर २ सरकार र लालबन्दी नगरपालिकाको रु ३० लाख रकममा २०७६ जेठमा उपकरण जडान गरी सेवा सञ्चालनमा ल्याइएको थियो ।
नवलपुर सर्पदंश उपचार केन्द्र व्यवस्थापन समितिका अध्यक्ष बोधराज काफ्लेका अनुसार भेन्टिलेटर तथा आइसियु उपकरण स्वास्थ्य संस्थामा भएपनि दक्ष चिकित्सक नहुँदा उपकरण थन्किएको हो ।
उनले भने “स्वास्थ्य तथा जनसंख्या मन्त्रालयलाई चिकित्सक पठाइदिन पटक पटक ध्यानाकर्षण गराउंदा पनि हालसम्म नपठाएको कारण उपकरण थन्किन गएको हो ।” सर्लाहीसहित आसपासका जिल्लाका सर्पदंश उपचार गर्न ल २०७० सालमा सो केन्द्र स्थापना भएको थियो ।
गर्मी तथा वर्षा याममा केन्द्रमा दैनिक १०÷१२ सर्पदंशका बिरामी आउने गरेका जनाइएको छ । सर्लाहीको बरथवा र नवलपुरमा उपचार केन्द्र रहेको भए पनि नवलपुरमा बिरामीको चाप बढी छ ।
हालसम्म उपचार केन्द्रले करिब चार हजार ५ सय बिरामीको उपचार गरी सकेको जनाएको छ । केन्द्रले बिरामीको सेवालाई मध्यनजर गर्दै २०७५ साल मङ्सिरबाट एम्बुलेन्स सेवासमेत सञ्चालनमा ल्याएको छ ।
एम्बुलेन्स सेवा समेत रहेको केन्द्रमा संयुक्त राष्ट्रसंघीय विकास कार्यक्रमको रु १२ लाखको आर्थिक सहयोगमा सोलार बत्ती तथा इन्भटर जडान गरी बिरामीलाई २४ सैँ घण्टा केन्द्रमा सेवा दिने स्थापना गरिएको थियो ।
यो विषयमा आफ्नो प्रतिक्रिया दिनुहोस् !