लोक समाचारदाता
जनकपुरधाम, फागुन ९ गते ।
महाशिवरात्रीको देशभरि सहित धनुषा जिल्लाको लक्ष्मिनियाँ गाउँपालिकाको सोहनी गाउँ स्थित सोमेश्वरनाथ महादेव मन्दिरमा समेत श्रद्धालु भक्तजनहरुको घुइचो लागेको छ ।
महाशिवरात्रीको अवसरमा सोमेश्वरनाथ महादेव मन्दिरमा रहेको शिवलिंगमा जलाभिषेक गर्न हजारौ श्रद्धालुहरुको एकाबिहानैदेखि घुइचो लागेको थियो । महाशिवरात्रीको अवसरमा सो मन्दिरमा दिउंसोदेखि शिव प्रवचन समेत वाचन गरिएको छ ।
शिव अनुयायी बिजली प्रसादद्वारा वाचन गरिएको शिव प्रवचन श्रवण गर्न हजारौ श्रद्धालुहरु उपस्थित थिए । यसका साथै बेलुकातिर धार्मिक सांस्कृतिक गीत भजन सहितको कार्यक्रम आयोजना गरिएको छ । यसअघि बिहानै शिवभक्तहरुले प्रभातफेरी समेत गरेका थिए ।
करीब ४ वर्षअघि स्थापना गरिएको सो मन्दिरमा महाशिवरात्री र श्रावणी सोमवारीको अवसरमा विभिन्न धार्मिक कार्यक्रमहरु अनुष्ठान गरिदै आएको कुरा स्थानीय हरिनारायण यादवले जानकारी दिएका छन ।
स्थानीयको सहयोगमा आयोजना गरिदै आएको विभिन्न धार्मिक अनुष्ठानमा धनुषा जिल्ला सहित छिमेकी जिल्ला र सीमावर्ती क्षेत्रका श्रद्धालु भक्तजनहरुको घुइचो लाग्दै आएको छ ।
यो विषयमा आफ्नो प्रतिक्रिया दिनुहोस् !