लोक समाचारदाता
जनकपुरधाम, फागुन ७ गते ।
छोराले नै शव कान्धामा बोक्नु र मलामी जानु भन्ने मधेशमा व्याप्त मान्यता धनुषाको सबैलामा घटित घटनाले बदलिएको छ ।
सबैला नगरपालिका २ सबैला बजारमा छोरीहरुले बुवाको शव कान्धामा बोकेर मसान लगेर गरेको अन्तिम क्रियाले समाजमा व्याप्त पृतसतात्मक सोच बदलिंदै गएको छ । बुवाआमाका क्रियामा बसेको कुरा कहिलेकाही पहाडतिर सुन्नमा आउने गथ्र्यो तर छोरीहरुले बुवाको शवलाई लिएर मसानसम्म पुगेको घटना मधेशमा पहिलो रहेको बुझिन्छ ।
मंगलवार रामनारायणको निधन पश्चात उनको शवलाई घरदेखि ५ किलोमीटर टाढा कमलाघाटसम्म लिएर ४ जना छोरीले काँधमा बोकेर पुगेको घटनाले मधेशमा व्याप्त रहेको महिलालाई मसानमा शव सँगै जानु हुदैन भन्ने धारणा बदलिन गएको हो ।
मृतक यादवका छोरा छैनन् । ५ जना छोरी मात्रै छन् । जेठी छोरी ४० वर्षीया नेतुर यादव, त्यसपछिका छोरीहरू ३७ वर्षीया राजोदेवी यादव, ३५ वर्षीया प्रमिलादेवी यादव, ३२ वर्षीया अनितादेवी यादव र ३० वर्षीया गोर्की यादवले बुवाको शवलाई काँध दिए । मृतक यादवको पार्थिव शरीरलाई उनकै पत्नी ६२ वर्षीया रवियादेवी यादवले दागबत्ती दिएकी छन् ।
अघिअघि श्रीमित, पछिपछि ४ जना दिदीबहिनीले काँधमा शव उठाएको र त्यसको पछि पछि गाउँ समाजका व्यक्तिहरु रामनाम सत्य है, सबका यही गत है भन्दै मलामी गइरहेको दृश्य अनौठो दृश्य हेर्दा सबै चकित मात्रै हैन गाउँ समाजका जो कोहीको पनि आँखा रसाएको देखियो ।
उनले उपस्थित संचारकर्मीको जिज्ञासामा भनिन् मेरो श्रीमानलाई छोरा छैन भन्ने कुराको कमी जिवनभरि महसूस भइरहन्थ्यो तर मैले आफ्ना सबै छोरीलाई नै छोरासरह मानेर पालनपोषण गरेपछि आज उहाँको शवलाई मसानसम्म ल्याएको घटनाले छोराको कमी पनि पुरा भएको महसूस गरेकी छु ।
रवियादेवीले भनिन् शुरुमा गाउँलेहरुले छोरीले शव बोक्नु हुनु हुँदैन यसले समाजमा नाकारात्मक धारणा दिन्छ भनिरहेको थियो तर आफूले छोरीले हाम्रो श्रीमानलाई कान्धा दिनेछ जसलाई मलामी जानुछ जाउँ नजानु छ नजाउँ अडान राखेपछि गाउँलेहरु पछि हटेर हाम्रो कुरामा सहमति जनाई तिनीहरु मलामी पुगे ।
बुवालाई छोरासरह नै ‘कन्धा’ दिन पाउँदा छोरासरह हक पाएको जस्तो महसूस भएको मृतक यादवकी छोरी प्रमिलादेवीले भन्छिन । उनले ‘समाजमा अहिलेसम्म छोराले नै कन्धा वा दागबत्ती दिनुपर्ने मान्यता रहेको छ त्यो मान्यतालाई परिवर्तन गरेर छोराभन्दा छोरी कम छैन आफू महसूस गरेको बताईन ।
मृतक यादव नेपाली कांग्रेसको कार्यकर्ता रहेको कारण उहाँको पार्थिव शरिरमा श्रद्धाञ्जली दिन नेपाली कांग्रेसका केन्द्रीय सदस्य तथा पूर्व मन्त्री आनन्दप्रसाद ढुंगाना पनि पुगेका थिए । पार्टीको झण्डा ओढाएर उनलाई सम्मान गरेको थियो ।
यो विषयमा आफ्नो प्रतिक्रिया दिनुहोस् !