लोक समाचारदाता
जनकपुरधाम, फागुन ४ गते ।
प्रदेश २ को नामाकरणको विषयमा प्रतिपक्षी दलहरु लचकतापछि मधेश प्रदेश नाम राख्नेमा सहमति नजिक पुगेपनि बैठक निष्कर्ष विहिन भएको छ ।
आइतवार अन्तिम पटकका लागि भनिएको सभामुख सरोजकुमार यादवको संयोजकत्वमा गठित प्रदेशको स्थायी राजधानी एवं नामाकरण विषक समितिको बसेको बैठकमा दलहरु नामाकरणको नजिक पुगेपनि सहमति जुटाउन सकेन ।
गत भदौ महिनामा नाम र राजधानीको विषयमा गरेको प्रस्तावहरु माथि सहमतिको क्रममा रहेका सत्ता साझेदार दलहरुले अघि सारेको मधेश प्रदेशको नाममा प्रतिपक्षी दलहरु लचक भएपनि त्यसमा केही थप्नु पर्ने भनी अडान लिएर बसेपनि बैठक निष्कर्षविहिन भएको हो ।
दलहरुले गरेको प्रस्तावमा सहमति जुटाउन सभामुख यादवको संयोजकत्वमा रहेको समितिले अन्तिम पटकको लागि यो बैठक आह्वान गरेको थियो । बैठकमा सत्तारुढ समाजवादी पार्टी र राजपा मधेश प्रदेश हुनु पर्नेमा अडिग रहेपनि सहमतिको लागी भन्दै नेकपाले जानकी मधेश र नेपाली काँग्रेसले मिथिला मधेश नाम अघि सारेका छन् ।
सबै दलका संसदीय दलका नेताहरु समेतको सहभागितामा आइतवार सम्पन्न समितिको बैठक नामाकरणको विषयमा सहमति नजिक पुगेको नेताहरुले प्रतिक्रिया दिएका छन् ।
प्रदेशको नामाकरण सम्बन्धि प्रस्तावमा सत्तारुढ समाजवादी पाटी र राष्ट्रिय जनता पार्टीले मधेश प्रदेश, प्रमुख प्रतिपक्षी नेकपाले जानकी प्रदेश, नेपाली काँग्रेसले मिथिला भोजपुरा र कांग्रेसकै केही सभासदहरुले मध्यमधेश भन्ने नाम दर्ता गराएका थिए ।
प्रदेश २ का मुख्यमन्त्री एवं समाजवादी पार्टी संसदीय दलका नेता लालबाबु राउतले नाम टुग्याउन नसकिए पनि दलहरु सहमति नजिक पुगेको प्रतिक्रिया दिएका छन । .उनले भने मुलुकमा संघीयता स्थापना गराउन मधेश आन्दोलनको ठूलो भूमिका रहेकाले मधेश प्रदेश हुनु पर्छ र प्रतिपक्षी दलहरुले पनि सहमति नजिक पुगेकोले समान्य छलफलपछि टुंगो लगाइनेछ ।
त्यसैगरी राजपा संसदीय दलका नेता एवं भौतिक पूर्वाधार विकास मन्त्री जितेन्द्र सोनलले नेकपा र नेपाली काँग्रेस समेत मधेशलाई स्वीकार गरिसकेकोले उहाँहरुको केही कुराहरु छन त्यसलाई मध्यनजर गर्दै आगामी अगामी बैठकबाट टुंगो लगाइने भने ।
प्रमुख प्रतिपक्षी नेकपा संसदीय दलका नेता सत्यनारायण मण्डलले आफुहरु मधेश नाममा सहमतिको लागि लचक भएर जानकी मधेशको प्रस्ताव अघि सारेको बताए ।
त्यस्तै अर्का प्रतिपक्षी दल नेपाली काँग्रेस संसदीय दलका नेता राम सरोज यादवले पनि मधेश नाममा हाम्रो कुनै विमति छैन तर मिथिलाको आफ्नो छुट्टै पहिचान रहेकोले सहमतिका लागि मिथिला मधेश नाम अघि सारेको छु यसमा सत्ता दलले पनि सहमति जनाउने बताए ।
पछिल्लो साता समितिको बैठकमा राजधानी जनकपुरधाम राख्ने दलहरुमा सहमति जनाइसकेको छ । समितिको आगामी बैठक सोमवार बस्ने जनाइएको छ ।
यो विषयमा आफ्नो प्रतिक्रिया दिनुहोस् !