लोक समाचारदाता
जनकपुरधाम, फागुन ४ गते ।
सरसफाईमा ढिला सुस्ती र वडाध्यक्षलाई नटेर्ने जनकपुरधाम उपमहानगरपालिकाका मेयर लालकिशोर साहको रवैयाप्रति वडाध्यक्षहरुले असन्तुष्टि जनाएको छ ।
जनकपुरधाम उपमहानगरपालिका ४ का अध्यक्ष सुदर्शन सिंहले मेयर साहले सरसफाईमा गरेको ढिला सुस्ती र वडाध्यक्षलाई नटेरेको प्रति समाजिक सञ्जालमै चर्को आलोचना गर्दै असन्तुष्टि व्यक्त गरेका छन ।
वडा नम्बर ४ शुक्रबारी बजार स्थित बाल उद्यान अगाडि महिनौदेखि थन्किएको फोहर उठाउन वडाध्यक्ष सिंहले गत २ महिनादेखि लिखित तथा ताकेता गर्दा पनि जेसीबी छैन भनेर मेयर साहले अटेर गर्दै आएको थियो ।
स्थानीयको दबावपछि दुई महिना पश्चात आइतवार मेयर साहले आफै जेसीबी पठाएर सो फोहर उठाउन लगाएका हुन । मेयर साहको यस्तो रवैया हेरेर वडाध्यक्ष सिंहले सार्वजनिक रुपमै समाजिक सञ्जालमा यस्तो मेयरको के काम जसले वडाध्यक्षलाई होच्याउने र काम बाधा गर्दै आएको भनी आलोचना गर्दै चर्को विरोध जनाएको छ ।
मेयर साहको पदीय घमण्ड र होच्याउने प्रवृतिबाट प्रताडित वडाध्यक्ष सिंह एक पात्र हुन । उनी जस्ता उपमहानगरपालिकाका अधिकांश वडाध्यक्ष मेयर साहको रवैयाप्रति पिडीत छन ।
वडाध्यक्षहरुले सरसफाईका लागि मेस्तर र गाडी माग्न जाँदा मेयर साहले दुव्र्यवहार, गाली गलौज र हप्काउने गरेको कयौं उदाहरण छन । पछिल्लो पटक वडा नम्बर २ कै सचिवलाई हप्काएर पठाएको श्रोतको दाबी छ ।
यी बाहेक वडानम्बर १, ३, ५, ७, ९, १० लगायतका अधिकांश वडा मेयर साहको प्रवृतिबाट सरसफाई, नगरबती आपूर्ति लगायतका विषयमा पिडीत छन । उनीहरुले सार्वजनिक रुपमा आफ्नो पीडा नराखेपनि आन्तरिक कुराकानीमा आफ्नो पीडा पोख्ने गरेका छन ।
यो विषयमा आफ्नो प्रतिक्रिया दिनुहोस् !