लोक समाचारदाता
जनकपुरधाम, माघ २८ गते ।
सर्पदंश न्यूनीकरण सचेतनाका लागि स्वयंसेवकहरुलाई दुई तालिम सम्पन्न भएको छ ।
सामुदायिक सुधार केन्द्र (सीआईसी) को आयोजना र यूएनडीपीको सहयोगमा प्रदेश २ का राजधानी जनकपुरधाममा माघ २७ र २८ गते आयोजित सर्पदंश न्यूनीकरण सम्बन्धी दुई दिने तालिम सम्पन्न भएको हो ।
सो तालिममा प्रदेशका धनुषा, महोत्तरी, सर्लाही, सिरहा र सप्तरी जिल्ला सहितका २० जना महिला स्वयंसेविका र स्वास्थ्य स्वयंसेवकहरुको सहभागिता रहेको छ । तालिममा प्रादेशिक अस्पताल जनकपुरधामका चिकित्सक डा. कृष्ण केडी दास र सर्पदंश उपचार केन्द्र बर्दिबासका अध्यक्ष कृष्ण देवकोटाले प्रशिक्षण दिएका छन ।
तालिममा सर्पदंश के हो, सर्पदंशबाट बच्ने उपाय, प्राथमिक उपचार लगायतका महत्वपूर्ण जानकारी दिइएको छ । तालिमको प्रमुख उद्देश्य स्थानीय स्तरमा सर्पदंश बारे सही सूचना प्रदान गर्ने र प्राथमिक उपचारपछि सम्भव नभए ढिलो नगरी सम्बन्धित उपचार केन्द्र पठाउने सहितका रहेको सिआईसीका संजय साहले जानकारी दिएका छन ।
सर्प दंशको अवस्था नेपालमा भयावह देखिएको छ । त्यसमा पनि तराई मधेशका जिल्लाहरु नै सबभन्दा बढी प्रभावित रहेको छ । एक प्रतिवेदन अनुसार विश्वमा प्रत्येक वर्ष ५० लाख मान्छे शर्पदंशको शिकार हुन्छ र कम्तिमा १ लाख मान्छे मर्ने गरिन्छ ।
नेपालमा हालसम्म यसको सही तथ्यांक रहेको छैन् तर अनुमानित वार्षिक २० हजार जति सर्प दंशको शिकार हुन्छ र १ हजारको हराहारीमा ज्यान गुमाउने गरेको छ । जसमा बढी शिकार गरीव, किसान, ग्रामिन जन समुदाय, बालबालिका र महिलाहरु रहेको छ ।
धनुषा जिल्लामा पनि शर्प दंशका अवस्था भयावह रहेको छ तर छुटै उपचार केन्द्र वा छुटै अस्पताल नभएकाले धनुषा जिल्लावाट प्रभावित शर्प दंश विरामीहरु छिमेकी जिल्ला महोत्तरीको गौरी बाँस र सिरहाको बन्दीपुरमा उपचार गराउँदै आएको छ । चालु आर्थिक वर्षमा मात्रै प्रदेश २ मा प्रादेशिक अस्पतालमा ५ सय ७५, सिरहाको बन्दीपुर स्थित उपचार केन्द्रमा २ सय ९१ र महोत्तरीको गौरीबाँस स्थित उपचार केन्द्रमा १४ जना गरी ८ सय ८० जना सर्पदंश प्रभावित उपचारका पुगेका छन ।
सर्पदंश उपचार केन्द्र विहिन रहेको धनुषामा जिल्लाको क्षिरेश्वरनाथ नगरपालिका ५ महेन्द्रनगर स्थित श्रीनाथ गण ब्यारेकमा यूएनडीपी र नगरपालिकाको सहयोगमा २० शैयाको उपचार केन्द्र स्थापना हुन लागेको छ । सो उपचार केन्द्रमा सैनिक क्याम्पले औषधी, स्थानिय साझेदार संस्था सामुदायिक सुधार केन्द्र (सी.आई.सी.) ले प्राविधिक र व्यवस्थापन सहयोग गर्ने भएको छ ।
सो सैनिक क्याम्पका चिकित्सकद्वारा उपचार गरिने सो उपचार केन्द्रमा जिल्लाका सवै स्थानिय तह लगायात छिमेकी जिल्ला र मित्र राष्ट्र भारतका सीमावर्ती क्षेत्रका स्थानीयलाई सहयोग पुग्नेछ ।
यो विषयमा आफ्नो प्रतिक्रिया दिनुहोस् !