लोक समाचारदाता
जनकपुरधाम, माघ २६ गते ।
मेयर लाल किशोर साहको दबंगगिरीको कारण जनकपुरधाम उपमहानगरपालिकाको आर्थिक कारोबार गत तीन महिनादेखि ठप्प भएको छ ।
आर्थिक कारोबार ठप्प भएको कारण कर्मचारीहरु कात्तिक महिना यतादेखि तलब खान सकेका छैनन भने पालिका अन्तर्गतका शिक्षकहरु समेतको तीन महिनादेखि तलब भत्ता खान पाएको छैन र अन्य आर्थिक कारोबार समेत ठप्प हुन गएको हो ।
लेखा अधिकृतको आभावमा प्रशासकीय अधिकृत धर्मानन्द जोशीकै नाममा खाता संचालन रहेको थियो । तर मेयर साहले अवैध काममा समेत सिफारिस र आर्थिक कारोबार भुक्तानीका लागि दिदै आएको दबावका कारण उनले पुसको दोश्रो सातामै सरुवा गराएपछि पालिकाको खाता नै संचालनमा नरहँदा आर्थिक कारोबार पुर्णरुपमा ठप्प हुन गएको छ ।
श्रोतका अनुसार मेयर साहले आफ्ना कार्यकर्ता र लठैत पाल्न अधिकृत जोशीलाई विभिन्न अवैध काममा सिफारिस र नभएका कामहरुको पनि भुक्तानी दिन दबाव दिदै आएको कारण उनी आएदेखि नै तनावमा थिए । मेयर साहको तनाव सहन नसकेपछि उनी यहाँबाट सरुवा गराएर थिए ।
उपमहानगरपालिकाका एक कर्मचारीका अनुसार मेयर साहले उनलाई आफ्नो अनुकुल काम गर्न दबाव दिदै आएको थियो यहाँसम्म की उनले चढने गाडी समेत मेयर साहले छिनिसकेका थिए । आफ्नो अनुकुल काम नगरे कुटपिट गर्ने, सरुवा गरिदिने लगायतका धाक धम्की समेत मेयर साहले दिदै आएको थियो । जोशी तनाव सहन नसकेपछि आफ्नो सरुवा नै गराएर गयो ।
यति मात्र मेयर साहको दबंगगिरीको शिकार काज सरुवामा खटाइएका लेखा अधिकृत आशुतोष ठाकुर समेत भएका छन । लेखा अधिकृत ठाकुरलाई मेयर साहले आफ्नो अनुकुल नै काम गर्न अर्थात अवैध कामको पनि भुक्तानी दिन दबाव दिएपछि उनीपनि शैक्षिक विदाको बहाना बनाई त्यहाँ निस्केको श्रोतको दाबी छ ।
दरबन्दीमा रहेका लेखा अधिकृत दिनेश साह विद्युतिय बल्ब प्रकरणमा अख्तियारको छानबीनमा कारवाहीमा परेपछि निलम्बन भएदेखि जिल्ला समन्वय समितिमा रहेका ठाकुरलाई काज सरुवामा उपमहानगरपालिकामा पठाइएको थियो । तर उनी गएको दुई महिना नबित्दै मेयर साहको दबाव सहन नसकेपछि शैक्षिक विदामा गयो । विदा कटिसकेपछि पनि उनी उपमहानगरपालिकामा फर्केर गएन ।
लोकपुकार सँग कुरा गर्दै लेखा अधिकृत ठाकुरले भने आफू १० दिनको लागि विदामा गएको थियो । तर जिसस, श्रम तथा रोजगार कार्यालयमा समेत काम रहेकोले उपमहानगरपालिकाको कामको दबाव थेग्न गाह्रो भएको कारण पुनः त्यहाँ गएको छैन ।
यस सम्बन्धमा उपमेयर रीता मिश्रले प्रशासकीय अधिकृत धर्मानन्द जोशी मेयर साहको र लेखा अधिकृत विहिन नरहेको कारण खाता संचालन हुन नसक्दा उपमहानगरपालिकाको आर्थिक कारोबार ठप्प रहेको कुरा बताएकी छिन ।
उनले भनिन प्रशासकीय अधिकृत धर्मानन्द जोशीको गत पुस महिनाको दोश्रो सातामा सरुवा भएको र काज सरुवामा रहेको लेखा अधिकृत आशुतोष ठाकुर समेत शैक्षिक विदामा रहेको कारण मंसिर महिनादेखि नै खाता सँचालन हुन सकेन र सो अघि पालिकाको सर्भर नै डाउन भएको कारण तीन महिनादेखि आर्थिक कारोबार ठप्प रहेको छ ।
आर्थिक कारोबार ठप्प भएपछि दिनहुँ दर्जनौ व्यक्ति भुक्तानीका लागि उपहानगरपालिका धाउने गरेको छ भने कर्मचारी र शिक्षकहरु समेत तलब नपाउँदा तनाव खेपिरहेका छन । उनीहरुले तलब भत्ताको यथाशिघ्र व्यवस्था नगरिए उपमहानगरपालिका विरुद्ध आन्दोलनमा जाने चेतावनी दिएका छन ।
उपमहानगरपालिकाका मेयर लालकिशोर साहले अधिकृत जोशीको सरुवा भएपछि मेहीलाल यादवलाई निमित प्रशासकीय अधिकृत त तोकियो, तर उहाँलाई आर्थिक कारोबारको जिम्मा नदिई मात्र प्रशासनिक कार्यको जिम्मा दिएका छन । कर्मचारीहरुले प्रशासकीय अधिकृत केन्द्रबाट नआउंदासम्म निमित अधिकृतकै नाममा खाता संचालन गरी तलब खुवाउन माँग गरेका छन ।
यता निमित अधिकृत यादवले भन्नु भयो आर्थिक कारोबार ठप्प भएपछि उपमहानगरपालिकामा काम गर्न निकै समस्या भएको छ, तर गर्ने के आफूलाई आर्थिक कारोबारको जिम्मा दिइएको छैन र लेखा अधिकृत सहित कर्मचारी नै छैनन । शिक्षक र सरसफाई देखि विकास निर्माणका काम गर्नेहरु दिनहुँ तलब भत्ताका लागि ताकेता गर्न आउँछन ।
शिक्षकको तलब भत्ता मात्रै होइन विद्यालयको दिवा खाजा, सरसफाई, व्यवस्थापन सम्बन्धी अन्य कारोबारमा आर्थिक कारोबारले समस्या उत्पन्न भएको छ ।
यो विषयमा आफ्नो प्रतिक्रिया दिनुहोस् !