लोक समाचारदाता
जनकपुरधाम, माघ १८ गते ।
प्रदेश २ सरकारले बेटी पढाउ बेटी बचाउ अभियान अन्तर्गत बालिकाहरुको बीमा रकम एकलाख रुपैयाबाट बढाएर तीन लाख पुरयाएको छ ।
शुक्रवार मन्त्रिपरिषदको निर्णय जानकारी दिने उद्देश्यले आयोजित पत्रकार सम्मेलनमा मुख्यमन्त्री लालबाब राउतले बेटी पढाउ बेटी बचाउ अभियान अन्तर्गत गतवर्ष माघ महिनापछि जन्मिने छोरीहरुको एक लाख रुपैयाको गरिदै आएको बीमा रकमलाई बढाएर ३ लाख गरिएको भने ।
उनले भने लैंगिक समानता र भ्रुण हत्या रोक्न शुरुवात गरिएको यो अभियान गतवर्ष अपेक्षा अनुसार सफल हुन नसकेपछि यसवर्षदेखि पालिकास्तरबाटै संचालन गराएका छौं । यसका साथै प्रत्येक पालिकालाई प्रदेश सरकारले जति रकम बिमित वापत दिइरहेको छ, त्यति नै रकम सम्बन्धित पालिकाबाट उपलब्ध गराउन अनुरोध गरेका छौं ।
मधेश शहीद प्रतिष्ठान र आर्युस्वास्थ्य विज्ञान प्रतिष्ठान
यसका साथै मधेश आन्दोलनमा ज्यान गुमाएका र घाइते भएका परिवारहरुको रोजगारी तथा पारिवारिक गुजर बसरका लािग मधेश शहिद प्रतिष्ठान गठन र प्रादेशिक अस्पताललाई आर्युविज्ञान स्वास्थ्य प्रतिष्ठानको रुपमा परिणत गर्ने निर्णय समेत मन्त्रिपरिषदबाट गरिएको मुख्यमन्त्री राउतले जानकारी पनि दिए ।
पत्रकारहरुको जिज्ञासामा सामुदायिक विद्यालयमा आधारभूत कक्षा अर्थात कक्षा १ देखि ८ सम्मको दलित र मुस्लिम समुदायका विपन्न बालिकालाई छात्रवृति कार्यक्रम समेत अघि बढाउने र गतवर्ष १४ हजार बालिकालाई बाँडिएको साइकलको संख्या बढाएर २० हजार गर्ने प्रक्रिया समेत अगाडि बढाइ सकिएको समेत भने ।
मुख्यमन्त्री कार्यालयबाटै संचालन भएको छोरी बिमा कार्यक्रम गतवर्ष प्रभावकारी हुन नसकेपछि यसवर्ष माघ २ गतेदेखि पालिकास्तरबाटै सेवाग्राहीको घरमै पुगेर सेवा दिने गरी संचालन गरिएको छ ।
छोरी बिमित अवस्था
गतवर्ष ४ हजार ३ सय ७३ बालिकाको बिमा गरिएको थियो भने मुख्यमन्त्री कार्यालय रहेको कागजात मध्ये ३ हजार १ सय १८ बालिकाको बिमा प्रक्रियामा रहेको छ । यसवर्षदेखि पालिका स्तरबाट कार्यक्रम संचालन भएपछि हालसम्मसप्तरीमा १४०८, सिरहा ११२९, धनुषा ६६९, महोत्तरी ८४६, सर्लाही ११७४, पर्सा ७७१, बारा १२०३ रौतहट ८१८ गरी प्रदेशभरिमा ८ हजार १८ बालिकाको बिमा भइसकेको जनाइएको छ ।
बेटी पढाउ बेटी बचाउ अभियान अन्तर्गत छोरीहरुको बिमाका लागि संघीय सरकारबाट गत वर्ष ५० करोड रुपैया सहयोग गरिएको थियो र यसवर्ष पनि सहयोग राशि आउने मुख्यमन्त्री राउतले भने ।
सो पत्रकार सम्मेलनमा प्रदेश सभा सदस्य रामआशिष यादव, अशोक यादव, मुख्यन्यायधिवक्ता दिपेन्द्र झा लगायतका व्यक्तिहरुको उपस्थिति रहेको थियो ।
यो विषयमा आफ्नो प्रतिक्रिया दिनुहोस् !