लोक समाचारदाता
जनकपुरधाम, माघ १२ गते ।
गत पुस २२ गते पत्रकारहरुमाथि भएको दुव्र्यवहार र कुटपिट घटना बारे नेपाल पत्रकार महासंघ धनुषाले जनकपुरधाम उपमहानगरपालिकाका मेयर लालकिशोर साह विरुद्ध किटानी जाहेरी दिएका छन् ।
महासंघका अध्यक्ष अनिल मिश्रले आफू लगायत अन्य पत्रकारहरुमाथि भएको अमानवीय व्यवहार बिरुद्ध उपमहानगरका मेयर साह बिरुद्ध जिल्ला प्रहरी कार्यालय धनुषामा किटानी जाहेरी दिएका छन् ।
जिप्रका धनुषाका प्रहरी उपरिक्षक रमेशकुमार बस्नेतले जाहेरी दर्ता नगरी कानूनी सल्लाह लिनुपर्छ भनी २४ घण्टाको समय लिएका छन् । यता महासंघका अध्यक्ष मिश्रले जिप्रकाले जाहेरी दर्ता नगरे न्यायका लागि अदालत जाने बताएका छन ।
गत पुस २२ गतेका दिन जानकी मन्दिर फुलबारी जग्गा अतिक्रमण बारे प्रतिक्रिया लिन पुगेका कान्तिपुर टेलिभिजनका सम्वाददाता अमरकान्त ठाकुर सहितका अन्य पत्रकारमाथि हातपात भएपछि घटनाको विषयमा कुरा गर्न पुगेका अध्यक्ष मिश्रलाई समेत दुव्र्यवहार भएको थियो, सोही विषयलाई लिएर अध्यक्ष मिश्रले किटानी जाहेरी दिएका हुन् ।
सो घटनामा कान्तिपुरका ठाकुर सहित देश संचारका राजा झा, उज्यालो नेटवर्कका सुभाष कर्ण र एबीसी टेलिभिजनका सुमित मिश्रा सहितका पत्रकार घाइते भएको थियो ।
मेयरकै कार्यकक्षमा पत्रकारहरुमाथि भएको हातपात एवं दुव्र्यवहारको घटनापछि उत्पन्न परस्थितिलाई साम्य पार्नका लागि धनुषाका प्रमुख जिल्ला अधिकारी प्रदीपराज कणेलको संयोजकत्वमा उपमहानगर र महासंघ बिच घटनामा संलग्न दोषीहरुलाई कानूनी दायरामा ल्याउने सहमति भएको थियो ।
तर सहमतिको दुई साता बितिसक्दा समेत दोषीहरुलाई कारवाही हुन नसकेको कारण मेयर साह विरुद्ध किटानी जाहेरी दिनु परेको महासंघका अध्यक्ष मिश्रले बताएका छन ।
यो विषयमा आफ्नो प्रतिक्रिया दिनुहोस् !