लोक समाचारदाता
जनकपुरधाम, माघ ९ गते ।
प्रदेश २ मा जारी राष्ट्रिय सभा सदस्यको निर्वाचनको रिपोर्टिंग पत्रकारहरुले कालोपट्टी बाँधेर गरेका छन ।
गत पुस २२ गतेका दिन जनकपुरधाम उपमहानगरपालिकामा पत्रकारहरुमाथि भएको हातपात तथा दुव्र्यवहारको बिरोधमा नेपाल पत्रकार महासंघद्वारा जारी आन्दोलनको क्रममा पत्रकारहरुले कालोपट्टी बाँधेर राष्ट्रिय सभा निर्वाचनको रिपोर्टिंग गरेका हुन ।
प्रेस स्वतन्त्रतालाई कुण्ठित पार्ने गरी पत्रकारहरुमाथि जनकपुरधाम उपमहानगरपालिकाका मेयर लालकिशोर साहले सुनियोजित रुपमा कुटपीट तथा दुव्र्यवहार गराएको थियो, हालसम्म दोषीमाथि कारवाही नभएको भन्दै विरोध स्वरुप माघ ७ गतेदेखि १८ गतेसम्म कालोपट्टी बाँधेर कार्यक्षेत्रमा कार्य गर्ने महासंघ अन्तर्गत गठित संघर्ष समितिले निर्णय गरेको थियो ।
पत्रकारहरुमाथि भएको घटना बारे दोषीमाथि कारवाही स्वरुप प्रमुख जिल्ला अधिकारी प्रदीपराज कणेलको रोहबर र विभिन्न राजनीतिक दलको उपस्थितिमा सर्वपक्षीय बैठकबाट महासंघ र उपमहानगरपालिकाबीच ९ बुँदे सहमति भएको थियो ।
तर दुई साता बितिसक्दा पनि सम्बन्धित निकायले सहमति कार्यान्वयन गराउन नसकेको भन्दै महासंघ अब उपमहानगरपालिका विरुद्ध माघ १० किटानी जाहेरी दिने तयारीमा जुटेको छ ।
सहमति पश्चात पनि दोषीहरुलाई कानूनी दायरामा नल्याइएकोले शान्तिपूर्ण रुपमा बिरोध गर्नु परिरहेको नेपाल पत्रकार महासंघ प्रदेश दुईका महासचिव किरण कुमार कर्णले बताएका छन ।
उनले प्रेस स्वतन्त्रता तथा सुचनाको हकको प्रत्याभूति नभएसम्म हाम्रो बिरोध जारी रह्ने चेतावनी समेत दिएका छन ।
गत पुस २२ गतेका दिन जानकी मन्दिर फुलबारी जग्गा अतिक्रमणको समाचार संकलनमा गएका कान्तिपुर टिभीका अमरकान्त ठाकुर, एबिसी टिभीका सुमित मिश्र, उज्यालो नेटवर्कका सुभाष कर्ण र देशसञ्चार डटकमका राजा झालाई मेयर साहकै कार्यकक्षमा दुव्र्यवहार तथा कुटपिट गरी घाइते बनाइएको थियो ।
यो विषयमा आफ्नो प्रतिक्रिया दिनुहोस् !