लोक समाचारदाता
जनकपुरधाम, माघ ८ गते ।
पत्रकारहरुमाथि भएको कुटपिट र दुव्र्यवहार घटना विरुद्ध नेपाल पत्रकार महासंघ धनुषाले जनकपुरधाम उपमहानगरपालिका विरुद्ध माघ १० गते जिल्ला प्रहरी कार्यालयमा किटानी जाहेरी दिने भएको छ ।
बुधवार नेपाल पत्रकार महासंघ धनुषा अन्तर्गत गठित संघर्ष समितिको आयोजनामा बसेको पत्रकारहको बैठकबाट घटनाको दुई साता बितिसक्दा पनि सम्बन्धित निकायले दोषीहरुमाथि कुनै कारवाही अगाडि नबढाएको गुनासो गर्दै जाहेरी कानूनी प्रक्रियामा जाने निर्णय गरिएको हो ।
पत्रकारहरुले घटनाबाट उत्पन्न समस्या समाधानका लागि प्रमुख जिल्ला अधिकारी प्रदीपराज कणेलको रोहबर र विभिन्न राजनीतिको दलको प्रतिनिधिको उपस्थितिमा गरिएको ९ बुँदे सहमति समेत कार्यान्वयन हुन नसकेको बारे समेतमा समेत छलफल गरेका थिए ।
बैठकबाट संघर्ष समितिको आन्दोलनलाई निरन्तरता दिदै माघ १० गते जनकपुरधाम उपमहानगरपालिका विरुद्ध पत्रकारहरुमाथि भएको अमानवीय दुव्र्यवहार र कुटपिट सम्बन्धमा किटानी जाहेरी दर्ता गराउने निर्णय गरियो ।
यसका साथै कानूनी सल्लाहकारहरुसंग उपमहानगरपालिका विरुद्ध प्रमाण मेटाउने, महिलाहरुलाई प्रयोग गरी समाजिक सञ्जाल लगायतका विभिन्न माध्यमबाट पत्रकारहरुलाई बदनाम गराउन खोजिएको सहितका विषयमा छलफल गरी अन्य मुद्दा लगाउने तयारी समेत गर्ने निर्णय गरियो ।
यसैबीच विरोध स्वरुप पत्रकारहरुले हातमा कालो पट्टी बाँधेर समाचार संकलन तथा सम्पादनको काम गर्ने सहितका संघर्ष समितिद्वारा घोषित आन्दोलन जारी रहेको छ ।
पुस २२ गतेका दिन जानकी मन्दिर फुलबारीको जग्गा अतिक्रमण बारे समाचार संकलनका लागि गएका कान्तिपुर टीभीका अमरकान्त ठाकुर, एपीवन टीभीका विकास साह र शत्रोहन महतोलाई दुव्र्यवहार तथा कुटपिट गरियो ।
त्यसपछि घटना बुझन गएका महासंघका अध्यक्ष अनिल मिश्रलाई उपमहानगरपालिकाका मेयर लालकिशोर साह र उनका आसेपासे तथा नगरप्रहरीको नाममा रहेका लठैतहरुले दुव्र्यवहार गरेको थियो भने उनी संगै गएका अन्य पत्रकाहरु उज्यालोका सुभाष कर्ण, देश संचारका राजा झा, एबीसी टेलिभिजनका सुमित मिश्रालाई सुनियोजित रुपमा कुटपिट गरी घाइते तिनीहरुले बनाएको थियो ।
त्यस पश्चात घटना ढाकछोप गर्न उपमहानगरपालिकाका प्रमुखले कर्मचारीहरुलाई प्रभावमा पारेर पालिकाको काम बन्द, पेन डाउन र नारा जुलुस सहितका विभिन्न कार्यक्रम थालेका थिए । त्यति मात्र होइन केही महिला कर्मचारी र पालिका बोर्ड सदस्यलाई पत्रकारद्वारा घाइते बनाइएको भनी अस्पतालमा भर्ना गरायो ।
मेयरको प्रभावमा परेका ती महिलालाई कुनै रोग वा चोटपटक नभएपनि अनावश्यक औषधी प्रयोग गरी स्वस्थ्य अवस्थाका रहेका ती महिलाहरुलाई रोगी बनाइयो । उपमहानगरपालिकाले आफूले गरेको करतूतबाट बच्न सिसिटीभी फुटेजमा रहेका प्रमाणहरु समेत आफू अनुकुल बनाउन केरकार गरी प्रमाण मेटाउन कायस् समेत गरेको विभिन्न समाजिक सञ्जालमा आएको फुटेजबाट प्रष्ट भएको आरोप लाग्दै आएको छ ।
यो विषयमा आफ्नो प्रतिक्रिया दिनुहोस् !