लोक समाचारदाता
जनकपुरधाम, माघ ३ गते ।
जनकपुरधाममा पहिलो पटक भव्य कार्यक्रम आयोजना वैष्णव सनातन धर्म प्रवर्तक आचार्य सम्राट आनन्द भाष्कर जगद्गुरु स्वामी १००८ श्री रामानन्दाचार्यजीको जन्मोत्सव मनाइएको छ ।
श्रीरामानन्दी श्री वैष्णव संघ परिवारको आयोजनामा जनकपुरधाम स्थित रामानन्द चौकमा भक्तमाल कथा, मंगल गान र शोभा यात्रा सहित ५ दिने जयन्ती महोत्सव मनाइएको हो ।
पुस २८ गतेदेखि माघ ३ गतेसम्म साध्वी चन्द्रकलाको मुखाकृतबाट श्रीरामजानकी कथा सहितको दिउंसो २ बजेदेखि ५ बजेसम्म भक्तमाल कथा वाचन गरिएको छ । त्यस्तै बेलुका ५ बजेदेखि ६ बजेसम्म बधाई मंगलगान प्रतिदिन गरिएको छ ।
माघ ३ गतेका दिन रामानन्दाचार्यको जन्मोत्सवका दिन बिहान ८ बजेदेखि पूजाआजा, १० बजेदेखि १२ बजेसम्म भक्तमाल कथा, १२ देखि २ बजेम्म रामानन्दाचार्यको महत्व र उनले दिएको उपदेश बारे जयन्ती सभा र दिउंसो २ बजेदेखि ४ बजेसम्म नगरपरिक्रमा सहितको शोभा यात्रा निकालिएको छ ।
सो दिन दिउंसो ४ बजेदेखि ६ बजेसम्म मंगल बधाईगान र प्रसाद वितरण गरी जन्मोत्सव समापन गरिएको छ । सो जन्मोत्सव हेर्न हजारौ श्रद्धालुभक्तजन तथा साधु सन्तहरुको सहभागिता रहेको छ ।
श्री रामानन्दी श्री वैष्णव संघका अध्यक्ष रामरोशन दासको अध्यक्षतामा भएको सो कार्यक्रममा रामानन्दीय वैष्णव परिवारसँग आबद्ध पदाधिकारी एवं विभिन्न मठ मन्दिरका सन्त महन्थको उपस्थिति रहेको थियो ।
अध्यक्ष रामरोशन दासले संचारकर्मीसँग कुरा गर्दै भने औपचारिक रुपमा पहिलो पटक रामानन्दाचार्यको जन्मोत्सव जनकपुरधाममा मनाइएको छ र प्रत्येक वर्ष यस कार्यक्रमलाई निरन्तरता दिइनेछ ।
यो विषयमा आफ्नो प्रतिक्रिया दिनुहोस् !