लोक समाचारदाता
जनकपुरधाम, पुस २९ गते ।
जनकपुरधाम उपमहानगरपालिकाका मेयर लालकिशोर साहले आफ्ना नातेदार र ८५ लाख रुपैया लिएर व्यक्तिको निजी घरजग्गा बचाउन जानकी मन्दिर फुलबारीको जग्गा अतिक्रमण गरेको लाग्दै आएको आरोप अब आरोप नभई सही हो प्रष्ट हुन थालेको छ ।
विश्व सम्पदामा सूचिकरणको पर्खाईमा रहेका प्रदेश २ को राजधानी जनकपुरधाम स्थित जानकी मन्दिर फुलबारीको जग्गा उपमहानगरपालिकाले सडक विस्तारको नाममा केही नातेदार र केही व्यक्तिसँग लिएको लाखौ रुपैया लिएको कारण घरजग्गा जोगाइएको कुरा मंगलवार सार्वजनिक गरिएको प्रतिवेदनले देखाउंछ ।
जनकपुरधाम उपमहानगरपालिकाले एडीबी परियोजना अन्तर्गत निर्माणधीन सडक विस्तारको क्रममा व्यक्तिको निजि जग्गा बचाउन जानकी मन्दिर फुलबारीको करीब ४ कट्ठा १ धुर जग्गा अतिक्रमण गरेको मंगलवार सार्वजनिक गरिएको नापजाँच प्रतिवेदनमा उल्लेख गरिएको छ ।
गत साता जिल्ला प्रशासन कार्यालयको प्रयासमा नापी कार्यालयद्वारा सरोकारवाला निकाय, बुद्धिजीवी र नागरिक समाजको रोहबरमा गरिएको स्थलगत नापचाँचबाट जानकी मन्दिर फुलबारीको सि.न. १३५५—२४ को कि.नं. ८ मा उत्तर मोडमा ४.८८ र ४.८५ मीटर, बीचमा ०.७० र पुर्व दक्षिण मोडमा ३ मीटर गरी कुल ०—०—४—१ धुर जग्गा अतिक्रमणमा परेको ठहर गरिएको छ ।
सो सि.नं. कि.नं. २५४ मा मात्र १ मीटर, २५५ मा ०.९० मी., १५० मा ०.७०, २५२ मा ०.६० मीटर मात्र जग्गा लिइएको छ । तर कि.नं. ३४, ३५, ६२, ६३, १३८ मा एक इन्च पनि जग्गा सडक विस्तारमा नलिइएको नापजाँच पश्चात तयार पारिएको प्रतिवेदनमा भनिएको छ ।
जनकपुरधाम उपमहानगरपालिकाका मेयर लालकिशोर साहले आफ्ना नातागोतामा पर्ने व्यक्तिहरुको घर जोगाउन आपसी लेनदेनको आधारमा तिनीहरु मध्ये केहीको कमै जग्गा लिइएको र अधिकांशको जग्गा नै अधिग्रहण नगरेको आरोप स्थानीयले लगाउंदै आएको छ ।
अतिक्रमण गरी बनाइएका संरचना हटाई सम्पदा क्षेत्र जोगाउने जिम्मा पाएको मेयर साहले आर्थिक चलखेल गरि आफ्ना आफन्त र नातागोताका घर जोगाउन तिनीहरुसँग ८५ लाख रुपैया लिई विश्व सम्पदा सूचीको पर्खाईमा रहेका जानकी मन्दिरलाई समाप्त पार्ने खेलमा लागेको वडा नं. ३ का अध्यक्ष दिपेन्द्र साहको आरोप रहेको छ ।
नगरप्रमुख साहले अतिक्रमण गरिएको जग्गामा बनाइएको घर हटाउने जिम्मा पाएपनि अतिक्रमणमुक्त बनाउन कुनै तत्परता नदेखाएको भन्दै स्थानियहरु विरोधस्वरुप पटकपटक आन्दोलन समेत गर्दै आएका छन् । जानकी मन्दिरको जग्गा अतिक्रमण गरी ९ मीटरको बाटो बनाउन लागिएको छ ।
जानकी मन्दिर फुलबारी जग्गा अतिक्रमणकै समाचार संकलनको क्रममा आपसी लेनदेनका आधारमा आफ्ना नातेदारको जग्गा बचाउन खोजिएको आरोपबाट बच्न मेयर साहले पत्रकारहरुलाई कुटपिट गरेको थियो । नापी कार्यालय धनुषाका प्रमुख नापी अधिकृत शत्रुधन यादवका अनुसार जानकी मन्दिरको बढि जग्गा अतिक्रमणमा परेको छ ।
यो विषयमा आफ्नो प्रतिक्रिया दिनुहोस् !