लोक समाचारदाता
जनकपुरधाम, पुस २८ गते ।
समाचार संकलनको क्रममा गत पुस २२ गते जनकपुरधाम उपमहानगरपालिकाका मेयरको निर्देशनमा पत्रकारलाई कुटपिट गरिएको घटना प्रकरणमा प्रमाणको आधारमा दोषीलाई पक्राउ गरी कारवाही गर्ने सर्वपक्षीय सहमति भएको छ ।
सोमवार जिल्ला प्रशासन कार्यालय धनुषाको रोहबरमा भएको सर्वपक्षीय बैठकका घटनाको छानबीन गरी उपलब्ध फुटेज र फोटोको आधारमा दोषी देखिएका व्यक्तिलाई कारवाही गर्ने सहमति भएको हो ।
उमहानगरपालिकामा भएको घटनाको सम्बन्धमा जिल्ला प्रहरी कार्यालय धनुषाले दोषी पहिचान गरी कारवाही प्रक्रिया अगाडी बढाउने, जानकी मन्दिर फुलबारी जग्गा अतिक्रमण बारे नापजाँच प्रतिवेदनको आधारमा कार्यान्वयन, उपमहानगरपालिकामा तत्काल सूचना अधिकारी राख्ने र आन्दोलनरत पक्षले आन्दोलन फिर्ता लिने सहितका ९ बुंदे सर्वपक्षीय सहमति बैठकमा भएको जनाइएको छ ।
सो बैठकमा राजनीतिक दलको तर्फबाट नेपाली कांग्रेस धनुषाका सभापति महेश शंकर गिरी, नेपाल कम्युनिष्ट पार्टी (नेकपा) धनुषाका सचिव दिपक यादव, राष्ट्रिय जनता पार्टी नेपाल धनुषाको अध्यक्ष मण्डलका संयोजक प्रमोद कुमार यादव, समाजवादी पार्टीका नगर संयोजक विष्णुदेव साह, जनकपुरधाम उपमहानगरपालिकाको तर्फबाट निमित्त प्रशासकिय अधिकृत मेहिलाल यादव, कर अधिकृत प्रमेश झा, कर्मचारी यूनियनका नेता कृष्ण कुमार झा, नेपाल पत्रकार महासंघ धनुषा शाखाका अध्यक्ष अनिल कुमार मिश्र, श्याम सुन्दर शशि, आन्दोलन संघर्ष समितिका सदस्य राजेश कुमार कर्ण र सशस्त्र तथा नेपाल प्रहरीका प्रमुख लगायतको उपस्थिति रहेको थियो ।
जानकी मन्दिर फुलबारी जग्गा अतिक्रमण सम्बन्धी समाचार संकलनको क्रममा मेयर लालकिशोर साहको प्रतिक्रिया लिन पुगेका कान्तिपुर टेलिभिजनका अमरकान्त ठाकुर, एपीवन टीभीका विकास साह र शत्रुध्न यादवलाई कुटपिट गरिएपछि घटना बारे सम्वयनका क्रममा उपमहानगरपालिका कर्मचारी र मेयर साहका लठैतहरुले करीब आधा दर्जन पत्रकारलाई कुटपिट गरी घाइते बनाएको थियो ।
यता पत्रकार महासंघले सहमति भएका बुँदाहरुमाथि चाँडै कारवाही प्रक्रिया अगाडी नबढाइए गठित आन्दोलन संघर्ष समितिले आगामी चरणको आन्दोलनका कार्यक्रमहरु अघि बढाउन बाध्य हुने चेतावनी समेत दिएका छन ।
यो विषयमा आफ्नो प्रतिक्रिया दिनुहोस् !