लोक समाचारदाता
जनकपुरधाम, पुस २५ गते ।
अवैध खोला उत्खननको विरोध गर्दा टिपरले किचेर एक युवकको हत्या गरिएको छ । सो घटनाले अवस्था तनावग्रस्त बनेको छ भने अवस्था नियन्त्रण लिन प्रहरीले कयौं राउण्ड आश्रुग्यास प्रहार गरिसकेको छ ।
शुक्रवार बिहानै मिथिला नगरपालिका ५ श्रीपुर स्थित औरही खोलामा अवैध रुपमा बालुवा गिट्टी उत्खन्न गरिरहंदा विरोधमा उत्रेका स्थानीय युवक २४ वर्षिय ओमप्रकाश भन्ने दिलिप कुमार महतोको टिपरले किचेर हत्या गरिएको हो ।
बिहान ४ बजे आफ्ना साथी रोशन यादवसंग मर्निंग वाकमा निस्केका ओमप्रकाशले अवैध रुपमा बालुवा गिट्टी उत्खन्न गरिरहेका ना ७ ख नम्बर ६४१३ को टिपरलाई रोक्न जाँदा टिपर चालकले उनको टाउकोमा टिपर चलाएर हत्या गरेको आरोप लगाइएको छ ।
घटना पश्चात त्यहाँको अवस्था तनावग्रस्त बनेको छ । अवस्थालाई नियन्त्रण लिन व्यापक रुपमा परिचालन गरिएको छ भने प्रहरीले लाठी चार्ज गर्दै एक दर्जनभन्दा बढी राउण्ड आश्रुग्यास प्रहार गरिसकेको बुझिएको छ ।
घटना पश्चात स्थानीयले विरोध जनाउंदै पूर्व पश्चिम राजमार्ग विहानैदेखि अवरुद्ध गरेका छन् । दोषीमाथि कारवाहीको मांग गर्दै घटना स्थल नजिकै मिथिला नगरपालिका ५ श्रीपुरको रामलक्ष्मण चोकमा स्थानीयहरुले टायरबालेर राजमार्ग अवरुद्ध गर्दै विरोध प्रदर्शन गरिरहेका छ् ।
भारतमा इन्जिनीयरिंगमा अध्ययनरत ओमप्रकाशको टाउको मै टिपर चलाइ हत्या गरिएको स्थानीयको आरोप रहेको छ । घटना लगतै प्रहरी पुगेर शव बरामद गरी पोस्टमार्टमको लागि प्रादेशिक अस्पतल जनकपुर पठाएको छ भने टिपर नियन्त्रणमा लिइएको इलाका प्रहरी कार्यालय ढल्केबरले जनाएको छ ।
ईलाका प्रहरी कार्यालय ढल्केबरका प्रहरी निरीक्षक रामकुमार यादवका अनुसार घटनाको प्रकृति हेर्दा नियोजित रुपमा टिपरले किचेर दिलिपको हत्या गरिएको हो । उनले घटना पश्चात् टिपर चालक त फरार भयो तर हामी टिपर नियन्त्रणमा लिइसकेका छौं चालकको खोजी कार्य जारी रहेको बताएका छन ।
यता जिल्ला प्रहरी कार्यालय धनुषाले शान्ति सुरक्षा कायम गर्न त्यहाँ प्रहरी परिचालन गरिसकिएको छ र दोषी भनिएका टिपर चालकको खोजी कार्य हामी तिव्र रुपमा गरिरहेका छौं जानकारी दिएको छ ।
यो विषयमा आफ्नो प्रतिक्रिया दिनुहोस् !