लोक समाचारदाता
जनकपुरधाम, पुस २३ गते ।
प्रदेश २ सरकारले पहिलो पटक आफ्नो पञ्चवर्षिय आवधिक योजनाको आधारपत्र सार्वजनिक गरेको छ ।
बुधबार एक पत्रकार सम्मेलन मार्फत मुख्यमन्त्री लालबाबु राउतले पञ्चवर्षिय आवधिक योजनाको आधारपत्र २०७६ सार्वजनिक गर्दै नीति तथा कार्यक्रममा समेटिएको योजनाहरु टेकेर ल्याइएका आधारपत्रकै आधारमा योजनाहरुले आगामी दिनमा ल्याइने बताए ।
प्रदेश नीति आयोगका अध्यक्ष समेत रहेका मुख्यमन्त्री राउतले आउँदो आर्थिक वर्षको नीति तथा कार्यक्रममा पनि आवधिक योजनाको आधारपत्रलाई टेकेर योजनाहरु समावेश गर्ने कुरामा जोड दिए ।
पत्रकार सम्मेलनमा नीति आयोगका उपाध्यक्ष डा. भोगेन्द्र झाले आउँदो पाँच वर्षपछि प्रादेशिक आर्थिक वृद्धि दर ११ प्रतिशत पुर्याउने लक्ष्य लिएको जानकारी दिए ।
प्रदेश २ को आर्थिक वृद्धि दर ६.५३ बाट आउँदो पाँच वर्षमा ११ प्रतिशत पुग्ने लक्ष्य राखिएको बताउंदै उनले २७.७ प्रतिशत रहेको गरिबी दर घटाएर २१ प्रतिशतमा झार्ने लक्ष्य लिएको जनाए ।
प्रदेशको कुल ग्राहस्थ उत्पादन ४ सय ८८ अर्वबाट ६ सय अर्व पुर्याउने लक्ष्य योजनामा रहेको भन्दै उपाध्यक्ष डा. झाले आउँदो पाँच वर्षमा प्रदेशको प्रति व्यक्ती आय एक हजार अमेरिकी डलर पुरयाउने लक्ष्य राखिएको समेत बताए ।
अवाधिक योजना सार्वजनिक कार्यक्रममा प्रमुख सचिव रामकृष्ण सुवेदी, मुख्यन्यायाधिवक्ता दिपेन्द्र झा समेतको उपस्थिति रहेको थियो ।
यो विषयमा आफ्नो प्रतिक्रिया दिनुहोस् !