लोक समाचारदाता
जनकपुरधाम, पुस २२ गते ।
जनकपुरधाम उपमहानगरपालिकाका मेयर लालकिशोर साहले समाचार संकलनमा गएका लोकपुकार कार्यकारी सम्पादक पत्रकार सुभाष कर्ण सहित करीब आधा दर्जन पत्रकारलाई आफ्नो कार्यकक्षमै नगर प्रहरीको नाममा राखेका गुण्डा लगाई कुटपिट गरी घाइते बनाएको छ ।
उपमहानगरपालिकाले सडक विस्तारको क्रममा जानकी मन्दिर फुलबारीको जग्गा मिचेको विवाद सम्बन्धमा मेयर साहको अभिव्यक्ति लिन पुगेका पत्रकारहरुलाई तिमी पत्रकारहरुले मिडिया आतंक फैलाउन खोेजेको भन्दै हप्काउंदै आफ्ना केही कार्यकर्ता र नगर प्रहरी लगाई कुटपिट गराएको हो ।
मेयर साहको प्रत्यक्ष निर्देशनमा नगर प्रहरी र उनका कार्यकर्ताहरुको कुटाईबाट पत्रकार कर्ण सहित, कान्तिपुर टीभीका अमरकान्त ठाकुर, एपीवन टीभीका विकास साह, शत्रुध्न यादव, एबीसी टिभीका सुमित मिश्रा र देश संचारका राजा झा घाइते भएका छन् ।
मेयरले यसरी कुटे पत्रकारलाई
कान्तिपुर टीभीका ठाकुर, एपीवन टीभीका विकास साह र शत्रुध्न यादव तथा उज्यालोका कर्ण जानकी मन्दिर फुलबारीको जग्गा अतिक्रमणको नापीमा के भयो भन्ने विषयमा अभिव्यक्ति (बाइट) लिन पुगेका थिए ।
मेयर साहले आफू मिटिंग व्यस्त छु भनेर साढे १० बजेदेखि डेढबजेसम्म ३ घण्टा कुराएर बसाए । त्यसपछि पनि बाहिर वेटिंग रुपमा बसेका पत्रकारहरुलाई बोलाएन , अन्त्यमा पत्रकारहरुले मेयरको कार्यकक्षमा प्रवेश गरेर तपाईको जग्गा अतिक्रमण सम्बन्धमा के धारणा छ सोध्नै लाग्दा, मेयर साहले तिमी पत्रकाहरु मिडिया आतंक फैलाउन लागेको गाली गर्दै यिनीहरुलाई यहाँबाट भगाउन निर्देशन दिए ।
मेयर साहको निर्देशन लगतै उनका पार्टीका कार्यकर्ताहरु र नगर प्रहरी दुवै मिलेर पत्रकारहरुलाई कुटपिट गर्दै घिसार्दै कार्यकक्षबाट बाहिर गरिदिए ।
घटना पश्चात समन्वयमा नेपाल पत्रकार महासंघका अध्यक्ष अनिल मिश्र सहितका टोली पुग्दा उनीमाथि नै जाइलाग्दा पत्रकारहरुले उनको बचाउ गर्न खोज्दा मेयरको कार्यकक्षमा रहेका २०÷२५ जनाको उनका कार्यकर्ता र नगरप्रहरीको समूहले उपस्थित सबै पत्रकारलाई प्लास्टिक पाइप, हेलमेट, मुक्का लगायतका सामाग्री लिएर कुटपिट गरयो ।
कुटपिट गर्नुका साथै क्यामेरा, मोबाइल लगायतका समाचार सामाग्री समेत नगर प्रहरीले खासेका छन् ।
घटना पश्चात नेपाल पत्रकार महासंघ धनुषाले मेयर साह प्रमुख अतिथि रहेको समाचार बहिष्कार गर्ने, कुटपिटको जाहेरी दर्ता गराउने र सबै स्थानीय तहमा सूचना प्रवक्ता राखियोस मांग सहित प्रमुख जिल्ला अधिकारलाई बुधवार ज्ञापन पत्र बुझाउने कार्यक्रम तय गरेको छ ।
यसैबीच मधेशी पत्रकार समाज नेपाल र नेपाल प्रेस संगठन समेतले घटनाको सत्य तथ्य छानबीन गरी तानाशाही प्रवृति देखाउंदै प्रेस स्वतन्त्रतामाथि हनन प्रयास गर्ने मेयर साहलाई कारवाहीको मांग समेत गरेको छ ।
यो विषयमा आफ्नो प्रतिक्रिया दिनुहोस् !