लोक समाचारदाता
जलेश्वर, पुस १६ गते ।
महोत्तरीमा पिकनिक मनाउन गएका एक किशोर गोली प्रहारबाट गम्भीर घाइते भएको छ ।
सीमावर्ती क्षेत्रमा पिकनिक मनाउन गएका जिल्लाको जलेश्वर नगरपालिका ५ विसनपुरका १४ वर्षीय अक्षय कापर गोली प्रहारबाट घाइते भएका हुन । बुधवार साँझ पिकनिकै क्रममा त्यही ठाउँका विनय सिंह भन्ने गोली प्रहार गरेको र घटना पश्चात फरार भएको घाइते अक्षयका पारिवारिक सदस्यले जनाएको छ ।
घटना लगतै घाइतेलाई उपचारको लागि जनकपुरको जानकी हेल्थकेयरमा भर्ना गरिएकोमा अस्पतालले यहाँ उपचार सम्भव नभएको भन्दै काठमाडौं रेफर गरेको बताइएको छ ।
यता ‘घट्नालगत्तै विनय सिंहको परिवारको एक सदस्यलाई नियन्त्रणमा लिइएको छ । फरार सिंहको खोजी जारी छ,’ प्रहरी उपरिक्षक (एसपी) श्यामकृष्ण अधिकारीले बताए । के कति कारणले घटना भएको भन्ने अनुसन्धान भइरहेको एसपी अधिकारीले जनाएको छ ।
यो विषयमा आफ्नो प्रतिक्रिया दिनुहोस् !