लोक समाचारदाता
जनकपुरधाम, पुस १३ गते ।
जिल्ला प्रशासन कार्यालय धनुषा अन्तर्गत रहेको अधिकृत संगमले कानूनको धज्जिया उडाउने र विकासको काममा असफलता हासिल गरेका मेयरहरुलाई उत्कृष्ट काम गरेको भन्दै सम्मान गरी नयाँ नजिर स्थापित गरेका छन ।
शनिवार अधिकृत संगमले आफ्नो साधारण सभामा शहीदनगर नगरपालिकाका मेयर उदय बरबरियाले लाई पनि नगरको विकास निर्माण, कृषि तथा पशुपालन व्यवसायको विकास, शिक्षा स्वास्थ्य क्षेत्रको विकास र गरिव तथा विपन्न वर्गको जीवन स्तर माथि उठाउन लगायतका उत्कृष्ट काम गरेको भनी सम्मान गरियो ।
तर वास्तवमा हेर्ने हो भने मेयर बरबरियाले वडा नं. २ चोराकोयलपुर मतौनामा बाटो निर्माणाको नाममा आफ्ना कार्यकर्ताको घर जोगाउन उच्च अदालतको आदेशको अव्हेलना गर्दै दर्जनौ गरीब निमुखाको घर तोडेका छन । उच्च अदालतले २०७४ सालमै एसएनआरटीपी अन्तर्गत हुने भनिएको सडक निर्माण कार्यमा निषेधाज्ञा जारी गरेको थियो ।
सो आदेशको धज्जिया उडाउंदै मेयर बरबरियाले नेकपा कार्यकर्ता धर्मनाथ यादवको घर जोगाउन कानूनतः वैद्यानिक रुपमा बसोबास गर्दै आएका निमुखाको घर बलजफ्ती प्रहरीकै सहयोगमा तोडि दिए । ती गरीब निमुखाले प्रतिकार गर्दा आफ्नो पक्ष कमजोर देखिएपछि घर तोडने कार्य छोडेर सडकमै ३/३ वटा खाल्डो खनेर तिनीहिरुको बाटो अवरुद्ध गरी क्रुर चरित्र प्रदर्शन गरेका छन । त्यति मात्र होइन जेष्ठ नागरिकहरुको समाजिक सुरक्षा भत्ताको रकम अन्य शिर्षकमा खर्च गरी ८/८ महिनाको बक्यौता राखेका छन ।
यस्ता क्रुर र निकृष्ट चरित्र प्रदर्शन गरिसकेका मेयरलाई कारवाही गर्नुको सट्टा अधिकृत संगमले उत्कृष्ट काम गरेको भनी सम्मान गर्नु भनेको कानूनका संरक्षकद्वारा नै कानूनको धज्जिया उडाउने कार्य भएको स्थानीय नागरिक समाज बुद्धिजीवीहरुको बुझाई छ ।
यस्तो उच्च अदालतको आदेश
त्यस्तै सडक फराकिलो, जनकपुरधामलाई धार्मिक शहर बनाउन, जनताको सेवामा देखाएउने गरी गुणस्तरीय विकासको काम गरेको भन्दै जनकपुरधाम उपमहानगरपालिकाका मेयर लालकिशोर साहलाई सम्मान गरेको छ ।
जबकि सडक फराकिलोको क्रममा मेयर साहले विभिन्न रिटमा अदालतले गरेको निषेधाज्ञाको अव्हेलना गर्दै घर तोडेर सडक निर्माण कार्यलाई निरन्तरता दिइयो, नगरको नाममा धाम त जोडियो तर जानकी मन्दिरकै पर्खाल भत्काएर नयाँ इतिहास रचियो । यतिको आरोप खेप्दै आएको अवस्थामा उत्कृष्ट काम गरेको भनी सम्मान गरियो ।
अधिकृत संगमले क्षिरेश्वरनाथ नगरपालिकाका मेयर योगेन्द्र पंजियारलाई विकास निर्माण र जनताको मन जित्ने गरी गुणस्तरीय काम गरेको भनी सम्मान गरेका छन् ।
मेयर पजियारले विकास निर्माणको कार्यमा गत आर्थिक वर्षमा करीब डेढ सय योजनामा मुश्किलले १५ वटा योजना सम्पन्न गरी कुल बजेटको मात्र ९० प्रतिशत बजेट फ्रिज गराउन सफल भएको छ । पटक पटक जनताले मेयरको कार्यप्रति असन्तुष्टि जनाउंदै आन्दोलित रहदै आएका छन । आफ्नो कार्यकर्तालाई मात्र योजना वितरण गरेको र योजना अनुसार काम नभएको गुनासो आइरहेको क्रममा उनलाई जनताको लागि उत्कृष्ट काम गरेको अधिकृत संगमलाई देखा परेको छ ।
हुनत दुधले धोएको सफा र स्वच्छ जिल्लाका कुनैपनि मेयर छैनन तरपनि अधिकृत संगमले सम्मान गरेका यी तीनवटै मेयर पटक पटक विवादमा तानिदै आएको पछिल्लो गतिविधिले देखाइसकेको छ । ती सबैको मूल्यांकन नगरी चयनकर्ता प्रमुख जिल्ला अधिकारीले उत्कृष्ट भनी सम्मान गरेकोले नयाँ नजिर स्थापित भएको जिल्लावासीको बुझाई छ ।
यो विषयमा आफ्नो प्रतिक्रिया दिनुहोस् !