लोक समाचारदाता
विराटनगर, पुस १२ गते ।
विराटनगर महानगरपालिकाको वडा प्रहरी कार्यालय ‘क’ विराटनगरमा कार्यरत एक जना प्रहरी जवानले आत्महत्या गरेको छ । भोजपुर निवासी प्रहरी जवान २८ वर्षीय सञ्जीव खड्काको शव आफ्नै कार्यालयको शौचालय भित्र झुन्डिएको अवस्थामा शनिवार दिउंसो फेला परेको छ ।
भित्रबाट चुक्कुल र घाँटीमा मखलर (गाम्छा) को पासो लगाएको अवस्थामा खड्काको शव शौचालयको बलोमा झुन्डिएको फेला परेको मोरङ प्रहरी प्रमुख एसपी विश्व अधिकारीले बताएका छन् । अधिकारीले प्रहरी जवान खड्काले झुन्डिएर आत्महत्या गरेको हुन सक्ने बताए ।
परिवारका सदस्य आएपछि शव जिम्मा लगाइने उनले बताए । कानुनी प्रक्रिया पूरा गर्दै शव पोस्टमार्टमका लागि कोसी अस्पतालमा राखिएको छ । मोरङको इलाका प्रहरी कार्यालय उर्लाबारी दरबन्दी भएका खड्का गत चार दिनदेखि वडा प्रहरी कार्यालयमा कार्यरत थिए ।
उर्लाबारीमै कार्यरत रहेका बेला एक वर्ष अघि उनले थ्रीनट थ्री राइफलबाट आफ्नै छात्तीमा गोली प्रहार गरेर आत्महत्याको प्रयास गरेका थिए । छात्तीमा गम्भीर चोट लागेका कारण त्यतिबेला कोशी अस्पतालमा उपचारपछि उनलाई विराटनगरस्थित जिल्ला प्रहरी कार्यालयमा तानिएको थियो ।
एसपी अधिकारीले जनाए अनुसार जवान खड्काले यस अघि पनि पटक–पटक आत्महत्याको प्रयास गरेका थिए । मानसिक रुपमा विक्षिप्त रहेका उनलाई उपचार गराउने र सिनियर प्रहरी अधिकृतहरुबाट मनोपरामर्श दिने काम जारी रहेको अवस्थामा आत्महत्या गरेका हुन । साभार : जेवन न्यूज
यो विषयमा आफ्नो प्रतिक्रिया दिनुहोस् !