लोक समाचारदाता
जनकपुरधाम, पुस १० गते ।
आर्थिक लेनदेन र जग्गा विवादका कारण धनुषाको मिथिला नगरपालिका ९ स्थित बडहरीमा रानीदेवी पजियारको हत्या जेठाजुले गरेको रहस्य खुलेको छ ।
जनकपुरधाम उपमहानगरपालिका २१ कुर्था निवासी श्रीप्रसाद पजियारले आफ्ना भाई मिश्री पजियारको श्रीमति ३८ वर्षिया रानीदेवीको आर्थिक लेनदेन र जग्गा विवादको कारण हत्या गरेको प्रहरीले खुलासा गरेको छ ।
घटना पश्चात फरार रहेका श्रीप्रसादलाई पक्राउ गरी घटना बारे जानकारी दिने उद्देश्यले आयोजित पत्रकार सम्मेलनमा जिल्ला प्रहरी कार्यालय धनुषाले जनाएको हो ।
बुधवार दिउँसो रबडहरीस्थित आपँको बगैचामा श्रीप्रसादले धरिलो हतियार प्रयोग गरी बुहारी रानीको टाउको, नाक र बायाँ हातको तीन वटा औँला काटेर फरार भएका थिए ।
फरार श्रीप्रसादलाई जनकपुरधाम उपमहानगरपालिका १ स्थित रेल्वे ट्रयाकबाट बुधवार राति करिब ९ बजे जिप्रका धनुषाका अनुसन्धान शाखाका प्रमुख प्रहरी निरीक्षक उमाशंकर प्रसाद साह र ईलाका प्रहरी कार्यालय ढल्केबरका प्रहरी निरीक्षक राम कुमार यादवको कमाण्डमा खटेको संयुक्त प्रहरी टोलीले पक्राउ गरेको हो ।
पक्राउ पश्चात बिहीवार आयोजित पत्रकार सम्मेलनमा जिल्ला प्रहरी कार्यालय धनुषाका प्रहरी उपरिक्षक रमेश बस्नेतले आर्थिक लेनदेन र जग्गा विवादको रिसिबीका कारण श्रीप्रसादले आफ्नै बुहारीमाथि धारिलो हतियार प्रहार गरेको प्रारम्भीक अनुसन्धानमा बताए ।
उनले भने गम्भीर घाइते भएकी रानीलाई जानकारी प्राप्त हुनासाथ अस्थायी प्रहरी पोष्ट बडहरीबाट खटिएको प्रहरी टोलीले उहाँलाई उपचारको लागि मोडेल अस्पताल लालगढमा पठाएका थिए । त्यहाँ उपचार सम्भव नभएपछि प्रादेशिक अस्पताल जनकपुरमा ल्याउने क्रममा आफ्नै जेठाजु श्रीप्रसादले खुकरी प्रहार गरी फरार भएको बयान दिएकी थिइन ।
रानीको उपचारको क्रममा प्रादेशिक अस्पतालमै मृत्यु भएको थियो । कुर्था निवासी दुवैजना भएपनि घटना बडहरीमा कसरी भयो भन्ने जिज्ञासामा प्रहरी उपरिक्षक बस्नेतले भने घटनास्थल बडहरी मृतक रानीको बहिनीका ससुराली रहेको भने श्रीप्रसादको साढुको घर रहेको छ । दुवैजनाको बडहरीमै जम्काभेट भएपछि घटना हुन गएको हो ।
यो विषयमा आफ्नो प्रतिक्रिया दिनुहोस् !