हदिश खुद्दार
जनकपुरधाम, पुस ३ गते ।
प्रदेश २ सरकारले आफ्नै कर्मचारी राख्न कर्मचारी भर्ना प्रक्रिया थालेको छ ।
प्रदेश लोकसेवा आयोगले कर्मचारी भर्नाका लागि आवश्यक ऐन–कानुन तथा विज्ञहरूको छनोट प्रक्रिया अघि बढाएको छ । गत ४ कात्तिकदेखि संचालनमा आएको आयोगले पहिलो चरणमा कार्यालय व्यवस्थापनका साथै कर्मचारी भर्नाका लागि आवश्यक पर्ने ऐन, नियमावली, निर्देशिका तथा आचार संहिता लगायत निर्माण कार्यमा जुटेका छन् ।
आयोगका प्रवक्ता गंगेश गुञ्जन झाले प्रदेश निजामती ऐन, नियमावली, निर्दे्शिका लगायत मस्यौदा तयार भइसकेकोे उल्लेख गर्दै आयोगलाई चाहिने ऐन–कानुनको मस्यौदा तयार भइसकेको छ, छिटै पारित भएपछि आयोगमा कामले गति लिन्छ भने । लोकसेवा आयोगकै मापदण्डको हिसाबले प्रदेश लोकसेवाले पनि कर्मचारी भर्ना गर्ने सक्ने उनले बताए ।
लोकसेवा आयोगकै ऐन–कानुनलाई टेकेर प्रदेश लोकसेवा आयोगको ऐन–कानुन बनाइएको छ । त्यसैले, ऐन–कानुन देशभरि लागू हुन्छ तर प्रदेश लोकसेवाले प्रदेशभित्रै मात्रै काम गर्छ, त्यसकारण प्रदेशको आवश्यकता र भूगोललाई ध्यानमा राखेर प्रदेश लोकसेवाको ऐन–कानुनको मस्यौदा तयार गरिएको उनले भने ।
प्रदेश सरकार तथा प्रदेश २ मा रहेका स्थानीय तह, प्रदेश प्रहरी लगायतका लागि आवश्यक पर्ने कर्मचारी प्रदेश लोकसेवाले छनोट गर्ने संवैधानिक व्यवस्था रहेको प्रवक्ता झाको भनाइ छ । आयोगले मुख्यमन्त्री तथा मन्त्रिपरिषद् कार्यालयलाई प्रदेश सरकारलाई आवश्यक कर्मचारी व्यवस्थापनका लागि ओ एन्ड एम गरेर तत्काल प्रदेश लोकसेवा आयोगलाई बुझाउन पत्रचा समेत गरिसकेको छ ।
प्रदेशका कुन मन्त्रालयका कति कर्मचारीको आवश्यकता छ ? प्रदेश सरकारलाई कति प्राविधिक कर्मचारी चाहियो ? तथा कुन विभागमा कति कर्मचारी चाहियो लगायत विषयमा स्पष्ट नभएसम्म आयोगले काम गर्न नसक्ने अवस्था रहेको कारण सरकारसँग ‘ओ एन्ड एम’ गरेर प्रतिवेदन दिन माग समेत गरेको छ ।
यो विषयमा आफ्नो प्रतिक्रिया दिनुहोस् !