लोक समाचारदाता
दाङ, पुस ३ गते ।
राप्तरी राजमार्ग अन्तर्गत दाङको तुलसीपुर कपुरबोट सडकखण्डमा ट्याक्टरको ठक्करले एक छात्राको मृत्यु भएको छ ।
तुलसीपुर स्थित तुलसी आवासीय मावि कक्षा ८ की छात्रा विजिता केसीको मृत्यु भएको प्रहरीले जनाएको छ । बिहीबार बिहान ट्याक्टरले ठक्कर दिँदा स्कुल जाँदै गरेकी १३ वर्षीय छात्रा विजिताको मृत्यु भएको प्रहरीले जनाएको छ ।
रा १ प १४३५ नम्बर ट्याक्टरको ठक्करबाट विजितासँगै हिँड्दै गरेकी १४ वर्षीया मनिषा वली भने घाइते भएकी छिन्। उनको स्थानीय अस्पतालमा उपचार भइरहेको छ । घाइते मनिषा कक्षा ८ की छात्रा हुन् ।
तीव्र गतिमा आएको ट्रकले स्कुल जाँदै गरेकी विजितालाई ठक्कर दिँदा मृत्यु भएको इलाका प्रहरी कार्यालय तुलसीपुरका डीएसपी हरिहरनाथ योगीले जानकारी दिएका छन । गम्भीर घाइते भएकी विजितालाई उपचारका राप्ति अस्पताल तुलसीपुर लगिएको थियो । उपचारका क्रममा उनको मृत्यु भएको हो ।
घटनापछि मृतकका आफन्त, विद्यार्थी र स्थानीयले सडक अवरुद्ध गरेपछि अवस्था तनावग्रस्त बनेको छ । ट्रक र चालककलाई नियन्त्रणमा लिएर घटनाको अनुसन्धान भइरहेको प्रहरीले जनाएको छ ।
यो विषयमा आफ्नो प्रतिक्रिया दिनुहोस् !