महेन्द्रनगरमा बम विस्फोट, इन्सपेक्टर सहित ३ को मृत्यु, ५ घाइते

लोक समाचारदाता
जनकपुरधाम, मंसिर २८ गते ।
धनुषाको क्षिरेश्वरनाथ नगरपालिका ५ महेन्द्रनगरमा भएको बम विस्फोटमा प्रहरी निरिक्षक सहित ३ जनाको मृत्यु र ३ जना घाइते भएको छ ।
शुक्रवार राति करीब १२ बजे ईलाका प्रहरी कार्यालय महेन्द्रनगर नजिकै भएको सो विस्फोटमा सोही प्रहरी चौकीका परी प्रहरी निरिक्षक अमिर दाहाल, राजेश्वर साह र उनका छोरा आनन्द साहको मृत्यु भएको छ ।
घटनामा गम्भीर घाइते भएका प्रहरी निरिक्षक दाहालको उपचारको क्रममा धरान स्थित विपी कोइराला विज्ञान प्रतिष्ठानमा शनिवार बिहान ७ बजे र राजेश्वर तथा आनन्दको घटनास्थलमै मृत्यु भएको र जिल्ला प्रहरी कार्यालय धनुषाका प्रहरी उपरिक्षक शेखर खनालले जानकारी दिएका छन् ।
स्थानीय राजेश्वर साहको घरमा शौचालय अगाडी राखिएको विस्फोट भएको थियो । बम छ भन्ने प्रहरीलाई खबर आएपछि प्रहरी निरिक्षक सहितका टोली यकिन गर्न गएकै बेला विस्फोट हुन गएको थियो ।
सो घटनामा परी प्रहरी जवान रिजन महतो, मृतक साहका छोरा प्रकाश साह र छोरी अञ्जली साह गम्भीर घाइते भएका थिए । उनीहरु सबैलाई जनकपुर स्थित प्रादेशिक अस्पतालमा उपचार सम्भव नभएपछि राति नै थप उपचारका लागि धरान पठाइएको छ । अन्य दुई जना समान्य घाइते भएको कारण परिचय खुल्न सकेको छैन । घटना पश्चात सो क्षेत्रको अवस्था तनावग्रस्त बनेको छ ।
बम कसले र किन राखेको भन्ने घटना बारे थप अनुसन्धान भइरहेको जिल्ला प्रहरी कार्यालय धनुषाले जनाएको छ । ऋणमा पैसा दिने साहुकारको रुपमा राजेश्वर साह काम गर्दै आएको थियो । पैसाकै लेनदेनले कसैले बम राखेको हुन सक्ने अनुमान स्थानीयको रहेको छ ।