फ्रि भिसा, फ्रि टिकट निती कार्यान्वयन गर्न मांग

लोक समाचारदाता
जनकपुरधाम, मंसिर २५ गते ।
वैदेशिक रोजगारमा जानेहरुका लागि फ्रि भिसा, फ्रि टिकट निती कार्यान्वयन गर्न आप्रवासी कामदार हकहित संरक्षण केन्द्र धनुषाले मांग गरेको छ ।
अन्तराष्ट्रिय आप्रवासी दिवसको अवसरमा बुधवार जनकपुरधाममा संचारकर्मीहरु संगको साक्षात्कार कार्याक्रममा आप्रवासी धनुषाका पदाधिकारीहरुले गएको असार २१ गतेदेखि श्रम तथा रोजगार मन्त्रालयद्वारा लागू गरिएको फ्रि भिसा, फ्रि टिकट नीति कार्यान्यन गर्न मांग गरे ।
यसका साथै उनीहरुले वैदेशिक रोजगारमा जानेहरु सँंग भइरहेको ठगी र शोषण न्यूनीकरणका लागि स्थनीय तहमै न्याय निरुपण हुनुपर्ने, वैदेशिक रोजगार विभाग तथा वैदेशिक रोजगार बोर्डबाट दिइने सेवा तथा सुविधा स्थानीय तहबाट दिनुपर्ने व्यवस्था मिलाउन मांग समेत नेपाल सरकार सँग गरेका छन् ।
साक्षात्कारमा समितिका निमित अध्यक्ष दुखरण यादवले वैदेशिक रोजगार सम्बन्धी क्षतिपुर्तिको मांग, उजुरी दिनुपर्ने हदम्याद हटाई कुनैपनि समयमा न्याय पाउनुपर्ने व्यवस्था सहितको १४ बुंदे मांग प्रस्तुत गरेका छन् ।
कार्यक्रममा निमित अध्यक्ष यादवले आप्रवासी कामदार हकहित संरक्षण केन्द्र स्थापना भएपछि वैदेशिक रोजगारमा रहेकाहरुका लागि निकै नै प्रभावकारी रहेको दाबी गर्दै तिनीहरुको हकहितका लागि लक्ष्मिनिया गाउँपालिकामा सहकारी संस्था गठन भइसकेको र अन्य ५ वटा पालिका गठनको प्रक्रिया जारी रहेको जानकारी समेत दिए ।
कार्यक्रम नेपाल पत्रकार महासंघ धनुषाका कोषाध्यक्ष अवधेश कामतले वैदेशिक रोजगारमा रहेकाहरुको हकहितका लागि संचार माध्यमहरुले सहयोग गर्दै आएको बताउंदै तिनीहरुको थप समस्या समाधानका लागि राज्यले गम्भीर हुनुपर्ने भने ।
आप्रवासी अन्तराष्ट्रिय दिवसको अवसरमा देशभर सहित धनुषामा समेत साप्ताहिक कार्यक्रम मनाइदै छ । सो अन्तर्गत संचारकर्मीहरुको साक्षात्कार, संस्थागत संवाद, प्लेकार्ड प्रदर्शन, स्थानीय तह सँग संवाद र आप्रवासीहरुको भेला लगायतका कार्यक्रम आयोजना गर्ने भएको छ ।