लोक समाचारदाता
जनकपुरधाम, मंसिर २३ गते ।
राष्ट्रिय खोप कार्यक्रम अन्तर्गत आउंदो फागुन १ गतेदेखि एक महिने दादुरा रुबेला अभियान संचालन हुने भएको छ ।
सोमवार जनकपुरधाममा आयोजित राष्ट्रिय खोप कार्यक्रम तथा दादुरा रुबेला खोप अभियान सम्बन्धी प्रदेश २ समाजिक विकास समितिका सदस्य, संचारकर्मी तथा सरोकारबाला बीच भएको अभिमुखीकरण तथा अन्तरक्रिया कार्यक्रममा जानकारी गराइएको छ ।
सन् २०२३ सम्म दादुरा रुबेलालाई उन्मूलन गर्ने उद्देश्यले देशैभरि दादुरा रुबेला खोप अभियान तथा पोलियो खोप अभियान दुई चरणमा सञ्चालन हुने भएको छ ।
देशैभरिमा प्रदेश २ को अवस्था निकै भयावह रहेको कारण पहिलो चरणमा प्रदेश १, २ र ५ मा संचालन हुनेछ भने दोश्रो चरणमा बांकी चारवटा प्रदेशमा संचालन गरिने कार्यक्रममा जानकारी गराइयो । त्यसैगरी २०७७ बैशाख र जेष्ट देखि रोटा खोप समेत संचालन हुने भएको छ ।
बालबालिकामा जन्मदेखि नै झाडा पखालाको समस्या विकराल बन्दै गएपछि नेपालमा पहिलो पटक रोटा खोप संचालनमा ल्याउन लागिएको हो । रोटा खोपका लागि ३२ करोड रुपैया बजेट समेत छुटयाइ सकिएको बताइएको छ ।
प्रदेशमा खोप कार्यक्रम प्रभावकारी बनाउन प्रदेश र स्थानीय सरकारलाई गम्भीर हुन कार्यक्रमा आग्रह गरिएको छ । संघीय सरकारले बजेटको अधिकांश रकम स्वास्थ्यतर्फ खोपमा खर्चिरहेपनि स्थानीय तहमा कार्यान्वयन हुन नसकेको गुनासो पटक पटक आइरहेको छ ।
गत दुई वर्षदेखि स्थानीय तहहरुमा खोप केन्द्र स्थापनाका लागि बजेट पठाइएपनि हिमाल र पहाडमा अधिकांश ठाउँमा खोप केन्द्र स्थापना भइसक्यो तर श्रोत साधन उपलब्ध सुगम ठाउँ प्रदेश २ का पालिकाहरुमा सो रकम फ्रिज भई खोप केन्द्र स्थापना हुन नसकेकोमा कार्यक्रममा उपस्थित स्वास्थ्य तथा जनसंख्या मन्त्रालयका कर्मचारीले दुखेसो समेत पोखे ।
कार्यक्रमका प्रमुख अतिथि समाजिक विकास राज्यमन्त्री अभिराम शर्माले प्रदेश सरकारले गत दुई वर्षको अवधिमा स्वास्थ्य क्षेत्रमा निकै प्रभावकारी काम गरेको दाबी गर्दै सघीय सरकारले पर्याप्त बजेट उपलब्ध गराउन नसकेको गुनासो गरे ।
समाजिक विकास समितिका सभापति जयनुल राईनको अध्यक्षतामा सम्पन्न सो कार्यक्रममा समितिका सदस्यहरु, राष्ट्रिय खोप केन्द्रका सल्लाहकार डा. जामुन सिंह, नेपाल पत्रकार महासंघ धनुषाका कोषाध्यक्ष अवधेश कामत लगायतका वक्ताहरुले आ आफ्ना धारणा राखेका थिए ।
यो विषयमा आफ्नो प्रतिक्रिया दिनुहोस् !