प्रहरीकै संरक्षणमा ईटहर्वामा अवैध मदिरा भट्टी संचालन र तस्करी

लोक समाचारदाता
जनकपुरधाम, कात्तिक ९ गते ।
धनुषा जिल्लाको विभिन्न सीमावर्ती क्षेत्रमा प्रहरीकै संरक्षणमा अवैध मदिरा भट्टी संचालन र खुल्ला तस्करी भइरहेको छ ।
जसको प्रमुख उदारहण हो जिल्लाको विदेह नगरपालिका स्थित इटहर्वा, जहाँ सीमाको दसगज्जाको एक÷डेढ सय मीटर भित्रै नेपाल र सशस्त्र प्रहरीको संरक्षणमै अवैध मदिरा भट्टी संचालन र तस्करी भइरहेको देखिएको छ ।
सीमा भन्दा सय मीटरको दूरीमा रहेको ईटहर्वा मठ (मन्दिर) अगाडि र वरिपरि राजेन्द्र कोल्ड स्टोर लगायतका एक दर्जनभन्दा अवैध मदिरा भट्ठीहरु संचालनमा हुंदै आएका छन भने नजिकै नवनिर्मित पुल तस्करहरुको अखाडा बन्न गएको छ ।

दसगज्जामा नवनिर्मित पुल र संचालनमा रहेको अवैध मदिरा भट्ठीको करीब एक सय मीटरको दूरीमा सुरक्षार्थ प्रहरी चौकी रहेको छ भने सीमा सुरक्षार्थ हेतु धनौजीमा एक किलोमीटरको दूरीमा सीमा सुरक्षा बल सशस्त्र प्रहरीको कैम्प राखिएको छ । तर दुवै तहका सुरक्षाका निकाय नियन्त्रणका लागि कारवाहीको गर्नुका सट्टा महिनाबारी रकम उठाउन संरक्षण दिदै आएको हो ।
पछिल्लो पटकको बैठकबाट एक हजार मीटर पर मदिरा भट्टी संचालन गर्न दुवै देशका सुरक्षा निकायबीच सहमति भएको हो । तर ती सहमति विपरित ईटहर्वा मात्र होइन जिल्लाका अन्य सीमावर्ती क्षेत्रमा समेत अवैध मदिरा भट्टीहरु संचालन हुँदै आएको छ । ती अवैध मदिरा भट्टीलाई कारवाहीको सट्टा महिनाबारी रुपमा अवैध रकम उठाउन संरक्षण दिदै आएको आरोप पटक पटक लाग्दै आएको छ ।

अवैध मदिरा भट्टी भारतीयको रजाई, नेपाललाई टाउको दुखाई

सो क्षेत्रमा तीन वर्ष अघिसम्म छिटुफुट रुपमा अवैध मदिरा भट्टी संचालनमा थियो । तर भारतको बिहारमा मदिरा प्रतिबन्ध भएपछि सो क्षेत्रमा भारतीय ग्राहकको वृद्धि हुन थालेपछि अहिले दर्जभन्दा बढी अवैध मदिरा संचालनमा आइसकेको छ ।
ईटहर्वामा संचालित अवैध मदिरा भट्टी भारतीय सीमावर्ती क्षेत्रका स्थानीयका लागि रजाई बनेको छ भने नेपाली स्थानीयका लागि टाउको दुखाई भइसकेको छ ।
मदिरा खाएका भारतीय तथा स्थानीयले ओहोर दोहोर गर्ने स्थानीय महिलालाई अपशब्द बोल्ने, दुव्र्यवहार गर्ने लगायतका क्रियाकलापले स्थानीयवासीलाई निकै समस्या भएको छ । उनीहरुले पटक पटक आवाज उठाएपनि महिनाबारी रकम उठाउंदै आएका प्रहरीले केही गर्न नसकी संरक्षणमा जुटेका छन् ।
लोकपुकारले रिपोर्टिंगको क्रममा जाँदा राजेन्द्र कोल्ड स्टोरमा मदिरा सेवन गरिरहेका श्याम मुखिया भन्ने एक भारतीयले भने बिहारमा मदिरा बन्द भएपछि आफूहरुलाई समस्या भन्दा राम्रो नै भएको छ । उनले भने त्यहाँ मदिरा खान सिमित रुपमा पाउने गरेको थियो । तर यहाँ त सस्तोका साथै खुलेआम रुपमा पाउने गरेकोले इच्छा अनुसार खाने गरेको छु ।
श्याम मुखिया त एउटा उदाहरण मात्र हुन । श्याम जस्ता सयौ भारतीय दैनिक रुपमा ईटहर्वामा संचालित अवैध मदिरा भट्टीमा दैनिक रुपमा आउने गरेको छ । ईटहर्वा सीमा अहिले भारतीयहरुका लागि मदिरा सेवनको अखाडा बन्न गएको छ भने ईटहर्वा सहित देउरी परवाहा, लखौरी र वैदेही लगायतका क्षेत्र नेपालीहरुका लागि तस्करीको अखाडा बन्न गएको छ । प्रहरीको मिलामतो र संरक्षणमा सो क्षेत्रबाट हुने गरेको तस्कारीको भारतीय सामान तराई मधेश राजधानी काठमाडौसम्म पुग्ने गरेको छ ।

सशस्त्र प्रहरी भन्छन : आफू केही गर्न सक्दैनौं

अवैध मदिरा भट्टी संचालन र तस्करी बारे सशस्त्र प्रहरी धर्नाजी कैम्पसँग जिज्ञासा राख्दा त्यहाँका प्रमुख पन्छिदै भने यो हाम्रो सरोकारको विषय होइन स्थनीय तहबाट स्वीकृति लिई संचालनमा रहेको छ र नजिकै रहेको नेपाल प्रहरी सँग सोध्नु के भइरहेछ ।
सीमा सुरक्षाको जिम्मा सशस्त्र प्रहरीको रहेको भन्ने दायित्व बोध गराउंदै उनले भने स्थानीय तहबाट स्वीकृति लिइ वैद्यानिक रुपमा संचालन गरिरहेको छ भने हामीले त्यसमा के गर्न सक्छौ भने । उनले पन्छिदै दिएको अभिव्यक्तिले प्रष्ट हुन्छ अवैध मदिरा भट्टी र तस्करसँग सशस्त्र प्रहरी महिनाबारी रकम असुल्दै आएको छ । उनीसँग नाम र पद पटक पटक सोध्दा के प्रयोजनका लागि किन चाहियो भनेर भनेन ।

छठपछि भट्टी हटाउने : नेपाल प्रहरी

अवैध मदिरा भट्टी र खुलेआम तस्करी बारे सीमा नजिकै रहेका प्रहरी चौकीका प्रमुख नरेश यादवसँग जिज्ञासा राख्दा उनले भने स्थानीय तहबाट स्वीकृति र राजश्व कार्यालयमा दर्ता भई तिनीहरुले संचालन गर्दै आएको हो ।
तर स्थानीयको दबावपछि आफू नगरपालिका प्रमुख र वडाअध्यक्षको रोहबरमा कुरा राखिसकेका छौ, आउंदो छठपछि तिनीहरु बन्द गर्ने भन्दै आएकोले अहिले केही गर्न नसकेको भने ।
तर तस्कारी बारे प्रमुख रायले ठाडै अस्वीकार गरे । उनले अस्वीकार गरेपनि सो क्षेत्रमा राति ८ बजेदेखि बिहान ४/५ बजेसम्म मोटरसाइकल र ट्याक्टर मार्फत खुलेआम तस्करी हुंदै आएको छ ।
यसअघि दिनमै तस्करी हुंदै आएको थियो । मिडियाले आवाज उठाउन थालेपछि प्रहरीले त्यसलाई परिवर्तन गरी आपसी सहमतिमा रातिमा गराउंदै आएको छ । प्रहरीको संरक्षणमा हुंदै आएको अवैध मदिरा भट्टी संचालन र तस्करीले सो क्षेत्रमा अपराधिक क्रियाकलाप समेत बढदै गएको छ ।