बाँडफाँडले प्रदेश २ लाई बनायो प्रतिपक्षविहिन

योजना साझेदारी संगै नेकपाको फाँटमा लोकसेवा, कांग्रेसले निती पाउने

न्यूज डेस्क
जनकपुरधाम, कात्तिक ४ गते ।
कुनै देश वा प्रदेशको विकासको प्रमुख पुर्वाधार हुन्छ सत्ताको प्रतिपक्ष ।
जसले सरकारलाई गलत कार्यबाट रोक्न मात्र होइन ध्यान नपुगेका ठाउँको विकास र भ्रष्टाचार विरुद्ध पर्दाफाँस गर्न अहम भूमिका निर्वाह गर्छ । तर प्रदेश २ लाई विकासे योजना र विभिन्न आयोग बाँडफाँडले प्रतिपक्ष विहिन बनाएको छ ।
पछिल्लो पटक प्रदेश २ सरकारले गरेको बजेट विनियोजनमा मनमानी र भ्रष्टाचार विरुद्ध प्रतिपक्षको मुख बन्द गर्न उपहार स्वरुप हैसियत अनुसारको योजना दियो । त्यति मात्र होइन संसदीय विकासे योजनाको रकम समेत बढाउकानुका साथै बाँडफाँड गरी चालू आर्थिक वर्षका बजेट पारित गराए ।
प्रतिपक्षलाई वशीकरण माहिर प्रदेश २ सरकारले अन्तोगत्वा प्रतिपक्षत्व अन्त्य पार्न अन्तिम हतियार प्रयोग गरे आयोगको पदीय बाँडफाँड । प्रदेश २ सरकारले अन्तिम हतियार प्रयोग गर्दै प्रमुख प्रतिपक्षी नेपाल कम्युनिष्ट पार्टीलाई लोक सेवा आयोगको महिला सदस्य दिएका छन भने कांग्रेसलाई निती आयोगको सदस्य दिइने सम्भावना रहेको छ ।

सरकारले गरेको कुकृत्व विरुद्ध मुख बन्द गर्न नेकपाले लोक सेवा आयोगमा पाएको महिला सदस्यको कोटामा डा. सुजाता देवलाई पठाएका छन भने समाजवादीले अध्यक्ष । श्रोतका अनुसार उता प्रतिपक्ष भनिएका कांग्रेसले नीति आयोगको सदस्य भागमा परेपनि कसलाई पठाउने छिनोफानो गर्न सकेको छैन । हुनत कांग्रेसले आफूले कुनै कोटा नलिएको कुरा भन्दै आएका छन् ।
प्रदेश लोक सेवा आयोग गठन भई अध्यक्ष पदको शपथ ग्रहणको महिना दिनपछि राजपाबाट महारुद्र झा र नेकपाबाट डा. सुजाता देवले प्रदेश प्रमुख रत्नेश्वरलाल कायस्थबाट पद तथा गोपनीयताका शपथ लिएका छन् । श्रोतका अनुसार कांग्रेस सहमतिय अनुसार सरकारले डा. हरिवंश झाको नेतृत्वमा रहेको निती आयोग गठन गरी नयाँ कार्यसमिति गठन गरेका छन् ।

नव गठित निती आयोगको उपाध्यक्ष चयन गरिएपनि सदस्यहरुमा कांग्रेसले निष्कर्ष निकाल्न नसकेको कारण ढिलाई हुंदै आएको श्रोतको दाबी छ । सो आयोगको उपाध्यक्ष सता पक्षधर समाजवादी पार्टीले पाएको छ भने सदस्य मध्ये एउटा राजपा र अर्को कांग्रेसले पाउने भएको छ ।
हुनत संवैधानिक र गठित आयोगमा सरकारले आफू अनुकुल काम गर्न÷गराउन सत्ता पक्षकै प्रतिनिधि वा समर्थक राख्ने परम्परा रहंदै आएको छ । तर प्रदेश २ ले आलोचनात्मक क्षविबाट बच्न यस्तो परम्पराको शुरुवात गरेका हुन ।

प्रदेश २ मा प्रमुख प्रतिपक्ष र प्रतिपक्षले नै सरकार विरुद्ध मुख बन्द गरिदिए भने विकासको काममा मनपर्दी अवश्य नै बढनेछ । किनभने सत्ता पक्षलाई आफूले गरेको भ्रष्टाचार र गलत कामको डर प्रतिपक्षबाट नै हुन्छ ।
प्रतिपक्षले सरकारलाई हरेक काममा आलोचनात्मक भूमिका संगै विकासको मागदर्शकको रुपमा हुन्छ । तर प्रदेश २ मा यस्तो हेर्न मिल्दैन किनभने प्रदेश सरकार अहिले प्रतिपक्ष विहिन बन्न गएको छ ।