लोक समाचारदाता
जनकपुरधाम, कात्तिक ३ गते ।
संघीय सरकार नेतृत्वकर्ता नेपाल कम्युनिष्ट पार्टी कागजी रुपमा एकीकृत भएपनि कार्यगत रुपमा गुट उपगुटमै विभाजित रहेको छ ।
तात्कालिन एमाले र एकीकृत नेकपा माओवादीबीच एकीकरण भएको तेश्रो वर्ष बित्न लाग्दा व्यवहारिक र कार्यगत रुपमा गुट उपगुट रुपमा अलग नै रहेको छ । जसको झल्को धनुषामा शनिवार छुट्टा छुट्टै रुपमा आयोजना गरिएको शुभकामना आदान प्रदान कार्यक्रममा देखिएको छ ।
माओवादीका उद्योग तथा आपूर्ति मन्त्री मातृका यादव गुटले सबैलामा र एमालेका भौतिक पुर्वाधार विकास मन्त्री रघुवीर महासेठ गुटले शहीदनगर नगरपालिकामा विजयादशमी, दिपावली तथा छठ पर्वको अवसरमा शुभकामना आदान प्रदान आयोजना गरियो ।
उद्योग, वाणिज्य तथा आपूर्ति मन्त्री मातृका प्रसाद यादवको प्रमुख आतिथ्यमा सबैलामा आयोजनामा गरिएको कार्यक्रममा केन्द्रीय कमिटी सदस्य तथा प्रदेश सह इन्चार्ज महेन्द्र पासमान, राम चन्द्र झा, रत्नेश्वर लाल गोईत, बोधमाया यादव, सत्रुधन महतो, यदुबंश झा, किशोरी साह, राम औतार पासमान, दिपक यादव लगायतको सहभागिता रहेको थियो ।
रघुवीर महासेठ गुटले शहिदनगर नगरपालिकामा आयोजना गरेको कार्यक्रममा केन्द्रिय सदस्य तथा जिल्ला इन्चार्ज मेयर उदय बरबरियाका बुवा श्रवण बरबरिया यादव प्रमुख अतिथि रहेको थियो ।
मेयर उदय बरबरियाको अध्यक्षतामा भएको सो कार्यक्रममा केन्द्रिय सदस्य योगनारायण यादव, प्रदेश सभा सदस्य रामचन्द्र मन्डल र नेताहरु हरिनारायण महतो, गंगाराम यादव, कमलदेव यादव, फुलकुमारी महतो, झल्कु यादव लगायका उपस्थिति रहेको थियो ।
नेकपाको संघीय सरकारमा एमाले कोटाबाट रघुवीर महासेठ र माओवादी कोटाबाट मातृका यादवले धनुषाबाट मन्त्री पद पाएका छन् । हाल धनुषामा पछिल्ला गुटहरुहराएपछि नेकपाको यी दुई मन्त्रीको गुट संचालनमा रहेको छ ।
घटना बारे जिल्ला अध्यक्ष राजकिशोर यादवले सोधपुछ गर्दा कुनै गुटबन्दी छैन, अलि अलि होला तर त्यो ठूलो कुरा होइन हामी आफै पार्टी भित्र मिलाएर अघि बढने प्रतिक्रिया दिएका छन् ।
हुनत एमालेमै एकीकृत अघिदेखि नै अध्यक्ष केपी ओली, वरिष्ठ नेता माधवकुमार नेपाल र झलनाथ खनाल गुटबन्दी हावी रहेको थियो भने माओवादीमा प्रचण्ड र नाराकाजी सहितका तीनवटा गुटबन्दी रहेको थियो । गुटबन्दीका मार झेल्दै आएका दुवै पार्टीले चुनावलाई लक्षित गरी कम्युनिष्ट शक्ति एकीकरण गर्न उद्देश्यले एकीकृत भएका थिए । तर तेश्रो वर्ष बित्न लाग्दा पनि रावण झै एउटा शरीरमा विभिन्न मुख गुटको रुपमा हावी छन् ।
यो विषयमा आफ्नो प्रतिक्रिया दिनुहोस् !