लोक समाचारदाता
जनकपुरधाम, कातिक १ गते ।
धनुषामा एक निजी विद्यालयका शिक्षक छात्रालाई यौन शोषण गरेको आरोपमा पक्राउ परेको छ ।
जिल्लाका मिथिला नगरपालिकाको केन्द्र ढल्केबर स्थित ढल्केबर एकेडमी बोर्डिङ्घ स्कुलका शिक्षक टेकेन्द्र दाहालले सोही विद्यालयमा पढने दुईजना नाबालिक छात्रालाई पटक पटक यौन शोषण गरेको आरोपमा पक्राउ परेको हो ।
झापाको मेचीनगर नगरपालिका ३ घर शिक्षक दाहालमाथि सो स्कूलको मिनि बोडर्समा पढने एक ७ वर्षिय र ९ वर्षिका छात्रालाई पटक पटक यौन शोषण गरेको आरोप लगाइएको छ ।
घटना सार्वजनिक भए लगतै गत असोज २८ गते नै प्रहरीले शिक्षक दाहाललाई पक्राउ गरेको कुरा इलाका प्रहरी कार्यालय ढल्केवरका प्रहरी निरीक्षक रामकुमार यादवले जनाएको छ ।
सो स्कुलमै बसेर समाजिक विषय अध्यापन गराउंदै आएका शिक्षक दाहालले दशैं अघिदेखि नै विदाको दिनको मौकाछोपी मिनी बोडर्समा पढ्दै गरेकी ती दुई छात्रालाई ललाईफकाई तथा धाकधम्की दिँदै पटक पटक यौन शोषण गर्दै आएको थियो । कसैलाई भन्यो भने ज्यान मार्ने धम्कीको डरले ती नाबालिक छात्राहरुले अहिलेसम्म कुरा गोप्य राखेका थिए ।
प्रहरीका अनुसार घटना सार्वजनिक भएपछि पीडित दुईबालिका र आरोपी शिक्षक टेकेन्द्रको जनकपुर अंचल अस्पतालमा स्वास्थ्य परीक्षण गरिएको छ । आरोपित शिक्षक टेकेन्द्रमाथि जवरजस्ती करणीको मुद्दा दायर गरी अनुसन्धान अघि बढाइएको प्रहरी निरीक्षक यादवले जनाएको छ ।
यो विषयमा आफ्नो प्रतिक्रिया दिनुहोस् !