लोक समाचारदाता
जनकपुरधाम, असोज २८ गते ।
बुद्ध एअरको जनकपुरधाम विमान स्थल स्थित काउण्टरमा तोडफोड र हातपात गरेको आरोपमा काठमाडौबाट पक्राउ परेका राष्ट्रिय जनता पार्टी नेपालका प्रतिनिधि सभा सांसद प्रमोद कुमार साहलाई कारवाहीका लागि जनकपुरधाम ल्याइएको छ ।
जिल्ला अदालत धनुषाले विमान स्थलमा तोडफोड र संचालनमा बाधा पुरयाएको आरोपमा पक्राउ पुर्जी जारी गरे लगतै त्रिभुवन अन्तराष्ट्रिय विमानस्थल काठमाडौबाट नेपाल प्रहरीले पक्राउ गरेको हो ।
काठमाडौबाट ओखलढुंगा जानका लागि त्रिभुवन विमान स्थल पुगेका सांसद साहलाई प्रहरीले मंगलवार बिहान करीब १२ बजे पक्राउ गरेको गरी करीब दिउंसो करीब पौने ५ बजे बुद्ध एअरकै विमानबाट उनलाई जनकपुर ल्याइएको हो ।
कडा सुरक्षाका बीच जनकपुर ल्याइएको बेलो राजपा नेपालका सांसद प्रदेश सभा सदस्य र नेता कार्यकर्ताहरुले विमान स्थलमा नेपाल सरकार र बुद्ध एअर विरुद्ध नाराबाजी समेत गरेका छन । उनीहरुले मधेशी नेताहरुलाई ज्यादती गर्ने काम होस, बुद्ध एअर मुर्दाबाद लगायतका नाराबाजी गरेका थिए ।
विमान स्थलमा तोडफोड गर्न सांसद साह विरुद्ध नागरिक उड्यान प्राद्यिकरण जनकपुरधामले गैर सैनिक हवाई उडान ऐन २०१५ अन्तर्गत जिल्ला प्रहरी कार्यालय धनुषामा जाहेरी दर्ता गराएको थियो । जिप्रका धनुषाले जाहेरीका आधारमा सांसदलाई पक्राउ गर्न अदालतबाट आदेश मांगेको थियो भने आदेश लगतै प्रहरी प्रधान कार्यालयलाई पक्राउ गर्न आग्रह गरेको थियो ।
सोमवार बिहान ११ः४० बजेको बुद्ध एअरको विमान ढिलो भएको कारण किड्नीका बिरामी नेपाली कांग्रेसका नेता दिलिप सहगल छटपटाई रहेको देखेर सांसद साह उनको पीडा सहन नसकी आक्रोशमा आई बुद्ध एअरको काउण्टरमा तोडफोड गरेका थिए । तोडफोड घटनापछि काठमाडौ जान लागेका सांसद साहलाई बुद्ध एअरका कर्मचारी रोक्न खोजेपछि दुवै पक्षबीच हातहाल समेत भएको थियो । पछि प्रमुख जिल्ला अधिकारी प्रदीपराज कणेलको निर्देशनमा उनलाई विमानमा चढन दिइएको थियो ।
जनकपुर ल्याइएपछि प्रहरी हिरासतमा रहेका सांसद साहलाई अनुसन्धानका लागि म्याद थप गर्न जिल्ला अदालत धनुषामा पेश गरिने बताइएको छ ।
उनी दोषी ठहर भएपछि तोडफोड घटनामा नष्ट भएको सामानको क्षतिपुर्तिका लागि बिगो सहितको भरपाई सहित एक वर्षदेखि ५ वर्षसम्म कैद सजाय र विमान संचालनमा वाधा पुरयाएको आरोप ठहर भएमा ५ वर्षदेखि १० वर्षसम्म कैद सजाय हुने कानूनी व्यवस्था रहेको छ ।
यो विषयमा आफ्नो प्रतिक्रिया दिनुहोस् !