लोक समाचारदाता
जनकपुरधाम, असोज २८ गते ।
बम विस्फोट र त्यसमा घाइते भएकालाई जिउंदै जलाएर मारेको आरोपमा पक्राउ परेका नेपाली कांग्रेसका सांसद अफ्ताब आलमलाई अनुसन्धानका लागि ७ दिनको म्याद थपिएको छ ।
गत दुई दिनअघि रौतहटको गौरबाट पक्राउ परेका सांसद आलमलाई घटनाको अनुसन्धान गर्न प्रहरीको आग्रहमा जिल्ला अदालत रौतहटले हिरासतमा राखी अनुसन्धान गर्न मंगलवार ७ दिनको म्याद थपेको हो ।
फोटो : गोविन्द महतो
रौटहट क्षेत्र नम्बर २ बाट निर्वाचित सांसद आलमलाई आइतवार बिहान ११ बजे जिल्लाको गौरबाट प्रहरीले पक्राउ गरिएको थियो भन्ने करा प्रदेश २ का प्रहरी प्रमुख, डीआईजी प्रद्धुमन कार्कीले पुष्टि गरेका थिए ।
पहिलो संविधान सभाको चुनावलाई लक्षित गरी २०६४ चैत २७ राति रौतहटको राजपुर खरदवामा भएको बम विस्फोटको घटनामा र विस्फोटमा परी घाइते भएका बम बनाउने मजदूर लगायतका व्यक्तिलाई ईट्टा भट्टामा जिउंदै झोकेर हत्या गरेको आरोप उनीमाथि रहेको छ ।
सांसद आलमले निर्वाचनमा बूथ कब्जा गर्न आफ्नै काकाको घरमा बम बनाउन लागेको थियो, सोही क्रममा बम विस्फोट भयो र १३ मजदूर घाइते भएको थियो । सांसद आलमले घटना लुकाउन घाइते भएका मजदूरहरुलाई जिउंदै इटाभटामा झोकी जलाएर मारेको भन्ने आरोप रहेको श्रोतको भनाई छ ।
यो विषयमा आफ्नो प्रतिक्रिया दिनुहोस् !