लोक समाचारदाता
जनकपुरधाम, असोज २८ गते ।
जनकपुरधाम विमान स्थल स्थित बुद्ध एअरको काउण्टरमा तोडफोड र हातपात गर्ने प्रतिनिधि सभा सांसद प्रमोद कुमार साहलाई त्रिभुवन विमान स्थल काठमाडौबाट पक्राउ गरी जनकपुरधाम ल्याइदैछ ।
जिल्ला अदालत धनुषाद्वारा विमान स्थल स्थित बुद्ध एअरको काउण्टरमा तोडफोड र विमान संचालनमा बाधा पुरयाएको आरोपमा पक्राउ पुर्जी जारी भए लगतै काठमाडौ विमानस्थलबाट पक्राउ परेका सांसद साहलाई अनुसन्धानका लागि जिल्ला प्रहरी कार्यालय धनुषा जनकपुरधाम ल्याउन लागेको बताइएको छ ।
बिहान करीब १२ बजेतिर पक्राउ परेका सांसद साहलाई दिउंसो ४ को विमानबाट जनकपुर आइपुग्ने प्रहरी श्रोतले जनाएको छ ।
काठमाडौबाट ओखलढुंगा जानका लागि त्रिभुवन विमान स्थल पुगेका सांसद साहलाई नेपाल प्रहरीले विमान स्थलमा तोडफोड र विमान संचालनमा वाधा पुरयाएको आरोपमा पक्राउ गरेको थियो ।
विमान स्थलमा तोडफोड गर्न सांसद साह विरुद्ध नागरिक उड्यान प्राद्यिकरण जनकपुरधामले जिल्ला प्रहरी कार्यालय धनुषामा जाहेरी दर्ता गराएको थियो । सो जाहेरीपछि सांसद साहलाई पक्राउ गर्न धनुषा प्रहरीले प्रहरी प्रधान कार्यालय र जिल्ला अदालत धनुषालाई आग्रह गरेको थियो ।
सोमवार दिउंसो सांसद साहले विमान ढिलो भएको भन्दै बुद्ध एअरको काउण्टरमा तोडफोड गरेपछि उनलाई विमानमा कर्मचारीले रोक्न खोज्दा कर्मचारीमाथि हातपात समेत गरेको आरोप रहेको उनीमाथि आरोप रहेको छ ।
सो घटनापछि नागरिक उड्यान प्राद्यिकरण जनकपुरधामले उनी विरुद्ध जिल्ला प्रहरी कार्यालय धनुषामा विमान संचालनमा बाधा अवरोध र तोडफोड भनी गैर सैनिक हवाई उडान ऐन २०१५ अन्तर्गत जाहेरी दर्ता गराएको थियो ।
यो विषयमा आफ्नो प्रतिक्रिया दिनुहोस् !