लोक समाचारदाता
जनकपुरधाम, असोज २८ गते ।
जनकपुरधाम विमानस्थल स्थित बुद्ध एअरको काउण्टरमा तोडफोड र कर्मचारीमाथि हातपात गर्ने राष्ट्रिय जनता पार्टी नेपालका प्रतिनिधि सभा सांसद प्रमोद साह विरुद्ध पक्राउ पुर्जी जारी भएको छ ।
बुद्ध एअरको काउण्टरमा तोडफोड एवं कर्मचारीमाथि हातपात गर्ने सांसद साह विरुद्ध प्रहरीको आग्रहमा जिल्ला अदालत धनुषाले पक्राउ पुर्जी जारी गरेको हो । सोमवार दिउंसो सांसद साहले विमान ढिलो भएको भन्दै बुद्ध एअरको काउण्टरमा तोडफोड गरेपछि उनलाई विमानमा कर्मचारीले रोक्न खोज्दा कर्मचारीमाथि हातपात समेत गरेको थियो ।
सो घटनापछि नागरिक उड्यान प्राद्यिकरण जनकपुरधामले उनी विरुद्ध जिल्ला प्रहरी कार्यालय धनुषामा विमान संचालनमा बाधा अवरोध र तोडफोड भनी गैर सैनिक हवाई उडान ऐन २०१५ अन्तर्गत जाहेरी दर्ता गराएको थियो ।
मुद्दा दर्तापछि जिप्रका धनुषाले अनुसन्धानका लागि हाल काठमाडौमा रहेका सांसद साहलाई नियन्त्रणमा लिन प्रहरी प्रधान कार्यालय र अदालतलाई जानकारी गराइसकेको जिल्ला प्रहरी कार्यालय धनुषाका प्रहरी नायब उपरिक्षक रामेश्वर कार्कीले जनाएको छ ।
सो उजुरीको आधारमा उनलाई नियन्त्रणमा लिई अनुसन्धान पछि स्थानीय अदालतमा फौजदारी अभियोग अन्तर्गत मुद्दा चलाइने छ । उनी दोषी ठहर भएपछि तोडफोड अन्तर्गत नष्ट भएको सामानको बिगो सहितको भरपाई सहित एकवर्षदेखि ५ वर्षसम्म कैद सजाय र विमान संचालनमा वाधा पुरयाएको आरोप ठहर भएमा ५ वर्षदेखि १० वर्षसम्म कैद सजाय हुने व्यवस्था रहेको छ ।
विमान ऐनमा के व्यवस्था छ
गैर सैनिक हवाई उडान ऐन २०१५ अन्तर्गत यस्ता अपराध गर्नेलाई नेपाली सेनाका जवान वा सुरक्षा अधिकारी वा जो सुकैले पक्राउ गरी अनुसन्धानका लागि तुरुन्त प्रहरीलाई बुझाउनेछ ।
विमानस्थल सुरक्षा विरुद्धको अपराध अन्तर्गत विमानस्थल तथा विमानस्थल क्षेत्र भित्र वा बाहिर रहेका संचार तथा उपकरण सहायक, दृष्टिगत सहायक, मौसम तथा जलवायू सम्बन्धि उपकरण, अग्नी निवारण तथा जिवनो उद्धार, सेवा सम्बन्धि यन्त्र तथा उपकरण, लगायत सुरक्षा सम्बन्धी अन्य उपकरण प्रत्यक्ष वा अप्रत्यक्ष तोडफोड वा नष्ट गरी क्षति पुरयाएको खण्डमा विमानस्थल सुरक्षा विरुद्धको अपराध मानिनेछ र सो अपराधमा नोक्सानी विगो भराई निजलाई एक वर्ष देखि ५ वर्ष सम्म कैद हुने व्यवस्था ऐनमा छ ।
त्यस्तै हवाई उडान कार्यसंग सम्बन्धित कुनै पनि कर्मचारी विमानस्थलमा सरकारी वा गैरसरकारी कर्मचारी हवाई यात्रु लगायत कुनै पनि व्यक्तिलाई हातहतियार लिई वा नलिई डर, धम्की, प्रलोभन वा कब्जामा लिई अन्य कुनै किसिमबाट हवाई उडान संचालन तथा बाधा उत्पन्न गराएको खण्डमा ५ वर्षदेखि १० वर्षसम्मको कैद सजायको व्यवस्था छ ।
घटना यस्तो थियो
सांसद साहले सोमबार जनकपुरबाट काठमाडौँ उडान भर्ने विहान ११ः४० को विमान डेढ बजेसम्म नआउंदा एकजना किड्नडीका बिरामी दर्दले छटपटाई रहेको कारण उनी आवेशमा आई विमान किन ढिलो भयो भन्दै बुद्ध एअरको काउण्डमा तोडफोड गरेका थिए ।
तोडफोडपछि विवाद बढदै जांदा विमान आएपछि काठमाडौ जान लागेका साहलाई बुद्ध एअरका कर्मचारीले उनलाई विमान चढन रोकेपछि दुवै पक्षबीच हातपातको अवस्था समेत श्रृजना भएको थियो । पछि धनुषाका प्रमुख जिल्ला अधिकारी प्रदीपराज कणेलको निर्देशनमा उनलाई विमान चढन दिएको थियो ।
यसअघि बुद्ध एअरले आफ्नो काउण्टरमा तोडफोड र कर्मचारी कुटने सांसद साहलाई पक्राउ गरी कारवाही नगरिए देशैभरि बुद्ध एअरको उडान ठप्प पार्ने चेतावनी दिएका थिए ।
यो विषयमा आफ्नो प्रतिक्रिया दिनुहोस् !