भ्रष्टाचार लुकाउन प्रदेश सरकारद्वारा जानकी मन्दिरको गलत रिपोर्ट सार्वजनिक

लोक समाचारदाता
जनकपुरधाम, असोज २५ गते ।
विश्व प्रसिद्ध जानकी मन्दिरको भइरहेको सौन्दर्यकरण निर्माण कार्यमा प्रदेश २ सरकारका स्वच्छता अभियान भ्रष्टाचार लुकाउन प्रदेश सरकारद्वारा ल्याबको गलत डकुमेन्ट सार्वजनिक गरिएको छ ।

जानकी मन्दिरको प्रांगणमा मापदण्ड विपरित नक्कली र पुरातत्व विभागको सहमति विपरित मार्बल्स टाइल्स लगाउने कार्य भइरहेको चौतर्फी आवाज उठन थालेपछि निर्माण कार्य अनुगमन तथा रेखदेखका जिम्मेवारी पाएका भौतिक पुर्वाधार विकास मन्त्रालयका सिनियर डिभिजनल इन्जिनीयर भगवान झाले एक पत्रकार सम्मेलन गरी पत्रकारलाई झुक्काउने कार्य गरेको छ ।
पत्रकार सम्मेलनमा प्रस्तुत गरिएको राहुल इन्जिनीयर्स ल्याब्रोटरीको टाइल्स ल्याब रिपोर्टको लेटर प्याड नै फरक देखिएको छ । सो ल्याब रिपोर्टको लेटरप्याड नै फरक देखिएपछि रिपोर्ट सही नै होला भन्नेमा आशंका उत्पन्न भएको छ ।

ल्याब रिपोर्टको लेटर प्याड फरक फरक

सो ल्याबको एक टेस्ट रिपोर्टको एक लेटर प्याडमा आर लेखिएको होलोग्राम, By NABL (Quality Council of India) लेखिएको छ भने NABL को लोगो समेत रहेको देखिएको छ । तर बांकी सैमपल देखाइएको र अर्का टेस्ट रिपोर्टमा लेखिएको छैन भने एनएबीएलको लोगो समेत प्रयोग गरिएको छ । कुनै पनि संस्थाको लेटर प्याड एउटै हुन्छ न कि फरक फरक यसले गर्दा रिपोर्ट सही हो कि गलत विभिन्न शंका उपशंका खडा भएको छ ।

भ्रष्टाचार लुकाउन प्रदेश सरकारले गरेको जाली कामले पत्रकारलाई झुक्याउने कार्य गरिएको प्रष्टै देखिन्छ । हुनत पत्रकार सम्मेलनमा यसमा कुरा उठेपनि फोटो कपीमा मिस्टेक हुन सक्ने भनी सम्बन्धित पक्षले पन्छिने प्रयास गरेका थिए ।
आश्चर्यको कुरा के छ भने पत्रकार सम्मेलनमा ल्याब रिपोर्ट पुरातत्व विभागमा पठाइ सकिएको जानकारी गराइएको थियो तर लोकपुकार सम्वाददाताले पुरातत्व विभाग सँग सम्पर्क गर्दा विभागमा प्रदेश सरकारले जानकी मन्दिरमा ओछयाउने गरिएको मार्बल टाइल्सको कुनै ल्याब रिपोर्ट पेश नगरिएको जनाएको छ ।
प्रदेश सरकारले भ्रष्टाचार विरुद्ध उठिरहेको आवाज दबाउन पुरातत्व विभागको हवाला दिदै पत्रकारलाई झुक्याउने जाली कार्य गरेको प्रष्ट देखिन्छ ।

विभागको इजाजत बिना अन्य निर्माण कार्य

विभागले प्रदेश सरकारलाई १६ एमएम सेतो कलरको मार्बल टाइल्स र मन्दिरको रंगसँग मेल खाने गरी रंगरोगन, टाइल्स र पुराना संरचना नबिग्रिने गरी मुख्य गेट निर्माणको इजाजत मात्र दिएको छ ।
तर प्रदेश सरकारले बजेट सकाउन विभागको सहमति विपरित मरम्मत सम्भार, अशोक रुखको बगौचा, पानी टयांकी र श्रद्धालु भक्तजन बस्ने फलाम सहितको लामो केही बेन्च समेत लगाउने कार्य आफ्नो योजना अनुरुप अघि बढाएको छ ।

विभाग सँग सम्पर्क गर्दा जानकी मन्दिर सौन्दर्यकरणको कार्य देख्दै आएका मन्जु सिंहले भनिन् हामीले प्रांगणमा सेतो रंगको मार्बल लगाउने र गेट निर्माणको इजाजत मात्र दिएका छौं । तर अन्य कार्यहरुका लागि प्रदेश सरकारले कुनै इजाजत लिएको छैन । विश्व सम्पदा सूचीमा सूचीकृतका लागि सिफारिस भएका जानकी मन्दिरमा कुनैपनि निर्माण कार्य वा सौन्दर्यकरण गर्न विभाग अन्तर्गत सम्पदा सूची हेरिरहेका शाखासँग समन्वय गरेर मात्र कार्य गर्न पटक पटक प्रदेश सरकारलाई सचेत गराउंदै आएको छ ।
जानकी मन्दिरमा सौन्दर्यकरणका बेन्च राख्नै परियो भने बगैचामा वा मन्दिरमा असर नपर्ने गरी ठाउंमा लगाउनुपर्ने र अशोक रुख मन्दिरको बगैचामा मात्र लगाउन पाउने विभागको भनाई छ तर प्रदेश सरकारले मन्दिरको प्रांगणमै दुवै साइड, बीचमा र अशोक रुख प्रांगणको चारैतिर लगाउने योजना राखेको छ ।

सम्पदा सूचीमा पर्न नदिने षडयन्त्रको आशंका

यति मात्र होइन प्रदेश सरकारले पार्किंग, मन्दिरको रंगरोगन र लाइटिंगको काम सहितको योजना समेत अघि सारेको छ । जबकि विभागले मन्दिरमा वर्षौदेखि रहेका रंग मात्र प्रयोग गर्न पाउने र पर्खाल फोडेर लाइटिंग गर्न नपाउने भन्दै आएको छ । प्रदेश सरकारको यस्तो कार्यले जानकी मन्दिरलाई विश्व सम्पदा सूचीमा पर्न नदिने प्रदेश सरकारको षडयन्त्र रहेको आशंका समेत बौद्धिक वर्गमा हुन थालेको छ ।
जानकी मन्दिरको सौन्दर्यकरण योजना अन्तर्गत ७ करोड २१ लाख रुपैयाको लागतमा काठमाडौ स्थित निर्माण कम्पनी प्रेरा जेभीको ठेक्कामा सौन्दर्यकरणका लागि मार्बल टाइल्स ओछयाउने र गेट निर्माणको काम हाल भइरहेको छ ।