लोक समाचारदाता
जनकपुरधाम,असोज २४ गते ।
प्रदेश २ का मुख्यमन्त्री लालाबाबु राउतले प्रदेशको शान्ति सुरक्षामा प्रहरी भन्दा एक कदम अगाडी अपराधी रहेकाले ठुलो चुनौती रहेको बताएका छन् ।
शुक्रबार जनकपुरधाममा ६४ औँ प्रहरी दिवसको अवसरमा बोल्दै मुख्यमन्त्री राउतले शान्ति सुरक्षाको अवस्थालाई कायम राख्नका लागि पुरानै प्रविधि पुरानै शैली र पुरानै विधि अपनाउने गरिएको कारण वर्तमान अवस्थामा चुनौति थपिएको भने ।
उनले प्रहरीलाई शान्ति सुरक्षा कायम राख्नका लागि आधुनिक ढंगले मानवअधिकारको ख्याल गर्दै कानूनले दिएको अधिकार बमोजिम कार्य गर्न निर्देशन दिदै अपराध न्यूनीकरण गर्न मुलुक प्रादेशिक संरचनामा गईसकेको नयाँ संरचना, नयाँ विधि, नवीनतम शैली र आधुनिक प्रविधिको प्रयोग गर्नुपर्नेमा जोड दिए ।
प्रदेश २ प्रहरी कार्यालयद्वारा आयोजित सो कार्यक्रममा बोल्दै आन्तरिक मामिला तथा कानूनमन्त्री ज्ञानेन्द्र कुमार यादवले संघीय सरकारले ल्याएको संघीय प्रहरी ऐन प्रमाणिकरण नभएकाले प्रदेश प्रहरी विधेयक लागु गर्न समस्या उत्पन्न भएको बताए ।
उनले संघीय सरकारले प्रहरी सम्बन्धी ऐन प्रमाणिकरण नगर्दा प्रदेशको शान्ति सुरक्षाको अवस्थामा खलल पुगिरहेको भन्दै तत्काल संघीय सरकारले ध्यान दिनुपर्ने आवश्यकतामा जोड दिए ।
सो कार्यक्रममा धनुषाका प्रहरी नायब उपरिक्षक रामेश्वर कार्की, प्रदेश नम्बर २ का प्रवक्ता समेत रहेका प्रहरी नायब उपरिक्षक ज्ञानकुमार महतो, सगरमाथा बेस क्याम्प सम्म साईकलले यात्रा गरेका रञ्जित साह, सिरहाका प्रहरी उपरिक्षक उमाप्रसाद चतुर्वेदी, महोत्तरीका प्रहरी नायब उपरिक्षक माधवप्रसाद बुढाथोकी, दर्जनौँ समाजसेवी र प्रहरीका सहिद परिवार लगायतलाई मुख्यमन्त्री राउतले दोसल्ला ओढाई सम्मान गरिएको थियो ।
यो विषयमा आफ्नो प्रतिक्रिया दिनुहोस् !