लोक समाचारदाता
लहान, असोज २३ गते ।
सिरहा जिल्लाको सिरहा नगरपालिका ९ गुलरिया टोलबाट प्रहरीले युवती अपहरण गरेको आरोपमा तीन जनालाई पक्राउ गरेको छ ।
उदयपुर जिल्ला घर ठेगाना भएकी १६ वर्षीया युवतीलाई अपहरण गरेर भारततर्फ लगिरहेको आरोपमा प्रहरीले अपहरणमा संलग्न गाडीसहित तीन जनालाई पक्राउ गरी बिहीवार सार्वजनिक गरेको छ ।
सांकेतिक फोटो
भारतीय नम्बरको बिआर ३२प ४२६२ नम्बरको स्कारपियोमा अपहरण गरी लगेको अवस्थामा जिल्ला प्रहरी कार्यालय सिरहाबाट खटिएको गस्ती टोलीले उनीहरुलाई पक्राउ गरेको हो ।
लहानस्थित दुर्गा मन्दिरमा मेला तथा सांस्कृतिक कार्यक्रम हेरेर अएका बिहानै करीब ३ बजेतिर फर्किरहेकी ती युवतीलाई बाटोबाटै अपहरण गरेको आरोप पक्राउ परेकाहरुमाथि रहेको छ ।
पक्राउ पर्नेहरुमा सिरहा नगरपालिका–९ निवासी २४ वर्षीय रामप्रकाश गोइत, ३६ वर्षीय गणेशकुमार यादव र सिरहा नगरपालिका–८ निवासी २२ वर्षीय नथुनी भन्ने चतुरानन्द यादवलाई पक्राउ गरी प्रहरीले सार्वजनिक गरेको हो ।
उक्त गाडीमा रहेका अन्य दुई जना भाग्न सफल भएको र उनीहरुको खोजीकार्य भइरहेको जिल्ला प्रहरी कार्यालय सिरहाका प्रबक्ता प्रहरी नायब उपरीक्षक अपिलराज बोहराले जानकारी दिएका छन् ।
अपहरण गरी लग्दै गर्दा बाटो छेउमै रहेको नालामा स्कारपियो फसेपछि ती युवतीले दिसा गर्न जान्छु भन्दै बहाना बनाई अपहरणकारीको कब्जाबाट भागेर प्रहरीलाई खबर गरेपछि उनीहरुर्ला पक्राउ गरिएको प्रहरी नायब उपरीक्षक बोहराले बताए ।
पक्राउ परेकाको साथबाट लागुऔषध नेट्रोभेट ट्याब्लेट ३०० पिस, आठ राउण्ड गोली, पर्स एक थान र रामप्रकाश गोइतको सवारी चालक अनुमतिपत्र (लाइसन्स) र मोबाइल सेटसमेत बरामद भएको प्रहरीले जनाएको छ ।
यो विषयमा आफ्नो प्रतिक्रिया दिनुहोस् !