लोक सम्वाददाता
जनकपुरधाम, असोज २२ गते ।
घुमुवा प्रहरीले धनुषाको सिमावर्ती क्षेत्रमा दुई जना बालकलाई हातपात गर्दै हत्कडी लगाएर भारत तर्फ लग्न खोजेपछी अवस्था तनावग्रस्त बनेको छ ।
नगराईन नगरपालिका वडा नम्बर ८ बस्ने १६ वर्षिय बिजय साह हलुवाई आफ्नो भाउजुलाई माइती छाडेर मोटरसाइकलबाट आउदै गर्दा खिरखिरया बिर्ताको मोडमा घुमुवा हवल्दार प्रेम शंकर ठाकुरले एक्कासी नियन्त्रणमा लिएर हातपात गर्दै भारततिर लग्न खोजेपछि स्थानीयवासी आक्रोशित बनेको थियो ।
घुमुवा प्रहरी ठाकुरले विजय सहित राजकुमार मण्डललाई हतकडी लगाएर लग्न खोजेपछि आक्रोशित स्थानीयले बहुअर्वा प्रहरी चौकीले घुमुवा हवल्दार ठाकुर, उनको सहयोगी राजेश साह, बिजय र राजकुमारलाई नियन्त्रण लिई प्रहरी चौकी घेराउ गरेको थियो ।
स्थानीयको संख्या बढन थालेपछि तनावग्रस्त अवस्था नियन्त्रणमा लिन सुरक्षार्थ खटिएका प्रहरीले ५ राउन्ड अश्रुग्यास प्रहार गरेका छन् भने अहिले अवस्था शान्तिपुर्ण रहेको बहुअर्वा प्रहरी चौकीका असई रामबाबु रायले बताए ।
उनले जनाए अनुसार नियन्त्रणमा रहेका घुमुवा प्रहरी हवल्दार ठाकुर र उनका सहयोगी राजेश साहलाई जिल्ला प्रहरी कार्यालय धनुषालाई जिम्मा लगाईएको छ भने ती दुई जना बालकलाई स्थानीय जनप्रतिनिधि तथा अभिभावकको जिम्मा लगाइने बताए ।
यसैबीच प्रहरी नियन्त्रणमा रहेका बिजयले आफुलाई प्रेम शंकर ठाकुरले थप्पडै थप्पडले हिर्काएको र पछि हत्कडी लगाएर मोटरसाइकलमा बसाएर सिमावर्ती क्षेत्र तर्फ लग्न खोजेको आरोप लगाएका छन् ।
तर घुमुवा प्रहरीले आफू हातपात नगरेको बताएका छन् ।
यो विषयमा आफ्नो प्रतिक्रिया दिनुहोस् !