लोक समाचारदाता
जनकपुरधाम, असोज २१ गते ।
प्रदेशको प्रमुख सडकको रुपमा रहेको पूर्व पश्चिम राजमार्ग अन्तर्गत बाराको पथलैयादेखि सिरहाको कमला सडक खण्डसम्मको फोर लेन सडक विस्तार हुने भएको छ ।
विश्व बैकसंग सडक विस्तारका लागि छलफल भैरहेको र ग्रिन सिगनल देखाइसकेको भन्ने कुरा विकास सहायता कार्यान्वयन महाशाखाका इन्जिनियर छविलाल पौडेलले जानकारी दिएका ।
विस्तृत आयोजना प्रतिवेदन अर्थात डिपिआर अध्ययन गर्न समेत अध्ययन कार्य चांडै अघि बढाइने उनले जनाए । विश्व बैंकले ग्रीन सिग्नल दिएको भएपनि सम्झौता हुने निश्चित हुन सकेको छैन ।
उनले जनाए अनुसार चार पाँच महिनाभित्रै सम्झौता गर्ने र यहि आर्थिक बर्ष्भित्र डिपिआर समेत तयार पार्ने योजना बनाईएको छ । आगामी बर्षबाट निर्माण नै सुरु गर्ने महाशाखाको योजना रहेको छ ।
बढ्दै गएको सवारी साधनको चापले राजमार्गका विभिन्न खण्ड साँघुरो बन्दै गएपछि सरकारले सडक विस्तार योजना अघि बढाएको छ ।
हालको दुईलेनको सडकलाई स्तरोन्नती गर्दै चार लेनको बनाउन लागिएको हो । १ सय ३० किलोमिटर लम्वाईको यो सडक विस्तारका लागि करिव ४० अर्व रुपैया लाग्ने अनुमान रहेको बताइएको छ । सरकारले पुरै पूर्व पश्चिम राजमार्ग (१०२८ किमी)लाई पाँच बर्षमा चार लेनको बनाउने सरकारको लक्ष्य रहेको छ ।
एसियाली विकास बैक (एडीबी)को सहयोगमा दुईवटा सडक खण्डको निर्माण गर्न लागिएको छ । भने एउटा खण्डको विश्वबैकसंग सहयोग माग्न लागिएको छ । विभिन्न दातृ निकायबाट ऋण सहयोग लिएर नेपाल सरकार आफैले लगानी गरेर आगामी पाँच बर्षमा पुर्व पश्चिम राजमार्गलाई चार लेनको बनाईने लक्ष्यका साथ काम अगाडि बढाइएको विकास सहायता कार्यान्वयन महाशाखा प्रमुख अर्जुनजंग थापाले जनाएको छ ।
त्यसैगरी अर्को सिरहाको कमला सप्तरीको कंचनपुर ८६.८२ किमीको खण्डलाई पनि विस्तार गर्ने ठेक्का आव्हान भैसकेको छ । कंचनपुर कुशाहा करिव ४० किमी र कुशाहा कमला ४७ किमी गरि दुईवटा खण्डमा विस्तार गर्न लागिएको । वोलपत्र आव्हान गरेर सम्झौता गर्न लागिएको भएपनि विवाद निस्केपछि प्रक्रिया रोकिएको थियो ।
विवाद हटिसकेकाले प्रक्रिया अघि बढाउन लागिएको आयोजना कार्यान्वयन निर्देशनालय (एडीबी) प्रमुख दिपक श्रेष्ठले जानकारी दिए । साढे तीन वर्षमा निर्माण कार्य सक्ने गरी २०७५ भदौमा नै वोलपत्र आव्हान भएको थियो । तर हालसम्म निर्माण कार्य प्रक्रिया अघि बढाइएको छैन ।
आर्थिक बर्ष २०७६÷०७७ को बजेटमा समेत चार लेनको बनाउने लक्ष्य राखिएको छ । पुर्व र पश्चिम गरि दुई चरणमा विस्तार गर्ने सरकारको योजना रहेको छ । विस्तारको काम भने सुरु भैसकेको छ । २०७५ चैतमा प्रधानमन्त्री केपी शर्मा ओलीले शिलान्यास गरेर नारायणगढ बुटवलको काम सुरु भएको थियो ।
कुल १ सय १५ किमीमध्ये नारायणगढ दाउन्ने ६५ किमी र दाउन्नेबाट बुटवल ५० किमी गरि दुईवटा खण्ड बनाएर निर्माण कार्य अघि बढाईएको छ भने दुवै खण्डको चिनियाँ कम्पनी चाईना स्टेट इन्जिनियरिङ कर्पोरेशन ठेक्का पाएको छ ।
करीब ६ महिना अघि नै ठेक्का लगाउदा साईट क्लियर गर्ने ठेक्का पनि यसैमा समावेश गरिएकाले काम सुरु हुन सकेको छैन् । विद्युतका पोल र रुखहरु हटाउन नसक्दा काम सुरु हुन सकेको छैन् । कार्तिकसम्म साईट क्लियर गरेर काम सुरु गर्ने योजना रहेको आयोजना साईट कार्यालय बर्दघाटका प्रमुख सुरेश न्यौपानेले जनाएको छ ।
यो विषयमा आफ्नो प्रतिक्रिया दिनुहोस् !