लोक सम्वाददाता
जनकपुरधाम, असोज १७ गते ।
प्रदेश २ सरकारले भ्रमण वर्ष सन् २०२० लाई लक्षित गरी प्रदेशमा पाँच लाखभन्दा बढी बाह्य पर्यटक भित्र्याउने तयारी थालेको छ ।
प्रदेश सरकारले भ्रमण वर्ष २०२० मा २० लाख पर्यटक भित्र्याउने सरकारको लक्ष्यलाई सफल बनाउन प्रदेशका आठवटै जिल्लामा सरसफाइसँगै प्रदेशभरि रहेका ऐतिहासिक, धार्मिक र पुरातात्विक धरोहरका साथै प्रमुख पर्यटकीय क्षेत्रहरुलाई लिपिबद्ध गर्न एकीकृत दस्तावेज गर्न लागेको बुझिएको छ ।
भ्रमण वर्ष २०२० का प्रदेश नं २ का संयोजक मनिष झाले आन्तरिक र बाह्य पर्यटक भित्र्याउन यो प्रदेशमा पर्यटकीय क्षेत्रहरु धेरै रहेपनि एकीकृत दस्तावेज नहुँदा त्यसबारे सबैलाई थाहा नभएकाले एकीकृत दस्तावेज तयार गर्न लागेको बताएका छन् ।
सप्तरी, सिरहा, धनुषा, महोत्तरी, सर्लाही, रौतहट, बारा र पर्सा सहितका ८ वटै जिल्लामा सयौंको संख्यामा धार्मिक र पर्यटकीय क्षेत्र रहेको छ तर वास्तविक संख्या एकिन नहुँदा पर्यटकलाई आर्कषण गर्न सकिने पर्यटकीय क्षेत्रहरुसमेत ओझेलमा परेको उनले बताए ।
उनले भने पर्यटकलाई आकर्षित गर्न कुन–कुन पर्यटकीय क्षेत्र तथा धार्मिकस्थलहरु उपयुक्त हुन्छ र त्यस्ता पर्यटकीय क्षेत्रहरु कतिको संख्यामा छन् भन्ने कुराहरु पत्ता लगाउन एकीकृत दस्तावेज तयार गर्न लागेका छौँ ।
तयार पारिएको एकीकृत दस्तावेज प्रदेशका ८ वटै जिल्लाका प्रमुख शहरमा रहेका होटल तथा लजहरुमा प्रचार–प्रसारका लागि राखिने उनले जानकारी समेत दिएका छन् ।
त्यस्तै भ्रमण वर्षलाई दृष्टिगत गरी प्रदेश स्थित जिल्लाका प्रमुख शहरहरुमा सरसफाइ अभियान सञ्चालन गरिएको छ । महोत्तरीबाट शुरु गरिएको सरसफाइ अभियान प्रदेश नं २ को सबै जिल्लाका प्रमुख शहरमा लैजाने र त्यसका लागि सरोकारकारवालाहरु सँग अन्तरक्रिया जारी रहेको जानकारी समेत ंसंयोजक झाले दिएका छन् ।
संघीय सरकारले कार्यविधि र बजेट उपलब्ध नगराउँदा भ्रमण वर्षको तयारीमा केही कठिनाइ भएपछि पनि भ्रमण वर्षलाई लक्षित गरी प्रदेश सरकारको सहयोगमा कार्यक्रम अघि बढाएको उनले बताए ।
यो विषयमा आफ्नो प्रतिक्रिया दिनुहोस् !