पर्यटकलाई आर्कषण गर्न सूचना केन्द्रको स्थापना

लोक सम्वाददाता
जनकपुरधाम, भदौं ६ गते ।
ऐतिहासिक तथा धार्मिक नगर जनकपुरधाममा आउने पर्यटकलाई सहयोग पुरयाउने उद्देश्यले पर्यटन सूचना केन्द्र स्थापना हुने भएको छ ।
शुक्रवार जनकपुरधाममा एक कार्यक्रम आयोजना गरी यस्तो जानकारी गराइएको छ । कार्यक्रममा सहभागी वक्ताहरुले जनकपुरधाम सहित अन्य धार्मिक स्थल बारे भित्रिने गरेको पर्यटकलाई थप आकर्षित र टेवा पुरयाउने संस्थाको आभाव रहेको अवस्थामा यो सूचना निकै नै सहयोगी हुने बताए ।
यूएनडीपीको सहयोगमा जनकपुरधाम उपमहानगरपालिकाको सहकार्यमा आधुनिक नेपालद्वारा स्थापना हुने सो सूचना केन्द्रले जनकपुरधाम आउने पर्यटकहरुलाई लिफ्टलेट, पोष्टर र सूचनामुलक सामाग्रीहरु मार्फत जनकपुरधाम क्षेत्र महत्व बारे जानकारी गराएर थप आर्कषण गर्ने काम गर्नेछ ।
यसका साथै मोबाइल एप, वेभ लिन्क र वाईफाईको सुविधा दिनुका साथै होर्डिंग बोर्ड र भित्ते लेखन मार्फत जनकपुरधामको धार्मिक महत्व बारे पर्यटकहरुमा जानकारी गराइने ।
कार्यक्रममा प्रमुख अतिथि जनकपुरधाम उपमहानगरपालिकाका मेयर लालकिशोर साहले पर्यटन सूचना केन्द्रले जनकपुरधामको पर्यटकीय क्षेत्रको प्रचार प्रसारमा निकै नै सहयोग हुने विश्वास व्यक्त गर्दै उपमहानगरपालिकाबाट सकेसम्मको सहयोग गर्ने प्रतिबद्धता जनाए । उनले आधुनिक नेपालले पर्यटन सूचना केन्द्रको अवधारणाले अवश्य नै पर्यटकलाई थप आकर्षण गर्न सक्ने भने ।
आधुनिक नेपालका अध्यक्ष तिवर्ग कुमार यादवको अध्यक्षतामा भएको सो कार्यक्रममा नेपाल पत्रकार महासंघका अध्यक्ष अनिल मिश्र, पर्यटन सूचना केन्द्र कार्यक्रमका संयोजक अरुण कुमार श्रीवास्तव, होटल व्यवसायी संघका अध्यक्ष सन्तोष गुप्ता, यूएनडीपीका प्रदेश २ का संयोजक धन बहादुर चन्द, समाजसेवी विष्णु कुँवरसहितका वक्ताहरुले पनि आ आफ्ना धारणा राखेका थिए ।