प्रदेश २ को नाममा ४ र राजधानीमा ५ प्रस्ताव दर्ता

नाम : मधेश, जानकी र मिथिला भोजपुरा र राजधानी : जनकपुर, बिरगंज प्रस्ताव

लोक न्युज डेस्क
जनकपुरधाम, भदौ ५ गते ।
लामो समय पश्चात प्रदेश २ को नाम र राजधानी टुंगो लगाउने कार्य औपचारिक रुपमा अघि बढाइएको छ ।
सरकार कार्यान्वयनमा आएको डेढ वर्षपछि बिहीवार प्रदेश २ सत्तारुढ र प्रतिपक्षी सहितका दलले प्रदेशको नाममा ४ वटा र राजधानीमा ५ वटा सहितको छुट्टा छुट्टै प्रस्ताव प्रदेश सभा सचिवालयमा दर्ता गराइएको छ ।
शुरुदेखि प्रदेशको नाम र राजधानीमा विवाद हुंदै आएकोमा प्रदेश सरकारले १७ लाख रुपैया खर्चेर सुझाव संकलन समिति बनायो, तर सरकाले समितिको प्रतिवेदन न त सार्वजनिक गरे न दलहरुसंग छलफल नै । अन्ततः सरकारले सहमति जुटाउन नसक्दा बिहीवार अन्तिम समयमा दलहरुले छुट्टा छुट्टै प्रस्ताव दर्ता गराएका हुन् ।
बिहीवार दर्ता गराइएको प्रस्तावमा प्रदेशका नाममा मधेश प्रदेश, मध्य मधेश प्रदेश, जानकी प्रदेश, मिथिला भोजपुरा र राजधानी जनकपुरधाम, बिरगंज गरी सीमा फरक सहित रहेको छ ।
दलहरुले प्रस्ताव दर्ता गराएकोमा सत्तारुढ दल समाजवादी पार्टी र राष्ट्रिय जनता पार्टी (राजपा) नेपालले संयुक्त रुपमा प्रदेशको नाम मधेश प्रदेश र राजधानी जनकपुरधाम सहित धनुषा महोत्तरीको माध्यमिकी परिक्रमासम्म क्षेत्र तोकेको छ । राजधानीको सीमामा मिथिला माध्यमिकि परिक्रमा सडक, उतरमा ढ्ल्केवर राजमार्ग छुनेगरी, पूर्वमा कमला नदि सम्म र दक्षिणमा भारतको सीमासम्म तोकिएको छ ।

त्यस्तै प्रमुख प्रतिपक्षी दल नेपाल कम्युनिस्ट पार्टी (नेकपा) ले प्रदेशको नाम ‘जानकी’ र राजधानी जनकपुर सहित धनुषाको माध्यमिकी क्षेत्र र प्रतिपक्षी कांग्रेसले प्रदेशको नाम मिथिला भोजपुरा र राजधानी जनकपुरधाम सहितको प्रस्ताव गराएको छ ।
ती दलहरुले आ आफ्नो संसदीय दलको बैठकबाट सर्वसम्मतिले निर्णय गरी प्रस्ताव दर्ता गराएपनि नेपाली कांग्रेसका बागी प्रदेशसभा सदस्य तथा समाजवादी पार्टीका बागी प्रदेशसभा सदस्यहरुले फरक फरक प्रस्ताव दर्ता समेत गराएका छन् ।
सतारुढ दलका समाजवादी पार्टीका तर्फबाट प्रमुख सचेतक शैलेन्द्र यादव, राजपाका तर्फबा प्रमुख सचेतक परमेश्वर साहले संयुक्त रुपमा प्रस्ताव दर्ता गराएका हुन । उनीहरुले मधेशी जनताको म्याण्डेट, मधेश आन्दोलनको म्याण्डेटको आधारमा आफूहरुले प्रदेशको नाम मधेश नै उपयुक्त हुने भन्दै नामका लागि मधेश प्रस्ताव गरेको बताएका छन् ।

काङ्ग्रेसको तर्फबाट सचेतक उपेन्द्र कुश्वाहाले प्रस्ताव दर्ता गराएका हुन भने नेकपा प्रदेश दुई संसदीय दलका नेता सत्यनारायण मण्डलले प्रस्ताव दर्ता गराएका हुन ।
नेपाली कांग्रेसका बागीहरुको तर्फबाट प्रदेशसभा सदस्य राजेश्वर प्रसाद साह प्रस्तावक रहेको प्रस्तावमा प्रदेशको नाम मध्य मधेश र राजधानीका लागि विरगंज प्रस्ताव दर्ता गराएका छन् । उनको प्रस्तावलाई नेपाली कांग्रेसका बागी प्रदेशसभा सदस्यहरु ओमप्रकाश शर्मा, शंकर प्रसाद शर्मा र असिया देवी थरुनीले समर्थन गरेका हुन् ।
त्यस्तै समाजवादी पार्टीका बागी प्रदेशसभा सदस्य सिंहासन सा कलवारले राजधानीका लागि फरक प्रस्ताव दर्ता गराएका हुन् । उनले दर्ता गराएको प्रस्तावमा विरगंजलाई राजधानीको रुपमा प्रस्ताव गरिएको हो ।