जबरदस्ती गराइएको बालविवाह घटना ढाकछोप गर्न जुटे वडाध्यक्ष

लोकपुकार न्यूज डेस्क
जनकपुरधाम, साउन २६ गते ।
धार्मिक नगरको रुपमा चिनिएका जनकपुरधाम उपमहानगरपालिका १९ बेंगाशिवपुर स्थित शिवपुरमा युवाहरुले जबरदस्ती गराएको बालविवाहको घटनालाई ढाकछोप गर्नमा वडाध्यक्ष जुटेका छन् ।
शिवपुरका अन्दाजी १६ वर्षिय विनिता (नाम परिवर्तन) र १७ वर्षिय श्याम (नाम परिवर्तन) बिच नाजायज सम्बन्धमा रहेको भन्दै स्थानीय युवाहरुले कुटपिट गर्दै उमेर नपुगेपनि जबरदस्ती बालविवाह गराएको घटनामा संलग्न रहेका आफ्ना नातेदारलाई बचाउन वडाध्यक्ष जगदीश यादवले ढाकछोप गर्नमा लागेका छन् ।
वडाध्यक्ष यादवले स्थानीय स्तरमै विवाद समाधान गर्ने भनी प्रहरी हिरासतमा रहेकाहरुलाई रिहा गराएर पिडीत परिवारलाई मिलापत्र गर्न दबाव दिइरहेको बताइएको छ ।
यता समाजिक सञ्चाल फेसबुकमा सो घटना सम्बन्धी भिडियो भाइरल भएको कारण र घटनाले गर्दा केटा केटी दुवै र उनका परिवारलाई घरबाट बाहिर निस्किन धौ धौ परिरहेको पिडीत परिवारले दुखेसो पोखेको छ । तर धनुषा प्रहरीले सो घटनामा आरोपीहरु विरुद्ध कुनै जाहेरी नपरेको कारण केही गर्न नसक्ने भनी मौन बसेको छ ।
घटनाको विवरण
गत साउन २२ गतेका दिन शिवपुरकी बालिका विनिता दिनको करीब १२÷१ को समयमा नजिककै चौरमा शौचका लागि गइरहेको बेला बाटोमा संगै पढने साथी स्थानीय केटा विकास भेटाउंदा कुराकानी गरिरहेको क्रममा केही स्थानीय युवाहरुले कुटपिट गर्दै जबरदस्ती तिनीहरुको बालविवाह गराएको छ ।
विनिताले संगै कक्षा १० सम्म पढेर उत्तिर्ण भई उच्च शिक्षाका लागि भारत बस्दै आएका साथी श्याम केहीदिन अघि घर आएको बेला आफू अनुतिर्ण भएको सहितका पढाई र सामान्य कुरा गरिरहेको बेला ती युवकहरुको समूहले तिनीहरुलाई नियन्त्रणमा लिई कुटपिट गर्दै विवाह गराएको हो ।
घटनाको केही समय पश्चात रेलवे प्रहरी चौकीका पुगेका प्रहरी टोलीले आरोपितहरुलाई पक्राउ गरे तर वडाध्यक्ष यादवले स्थानीय स्तरमा समाधान गर्ने भनी तिनीहरुलाई छोडाएर घटनालाई सामसुम पार्ने प्रयासमा जुटेका छन् ।
पिडीत विनिताका अनुसार कुराकानी गरिरहेको बेला आफूहरुलाई कुटपिट गर्दै घिसार्दै मन्दिरमा लगे विवाह गराउन त्यहाँ आफूहरुले आग्रह गरेपछि छोड दियो । तर त्यसको केही समय पश्चात स्थानीय प्राथमिक विद्यालयको प्रांगनमा लगी कुटपिट र रमितै गर्दै ती युवाहरुले जबरदस्ती विवाह गरायो ।
घटना पश्चात आफूलाई श्यामको घरमा थुनेर राखि दियो । पछि टोलवासीको सहमतिमा आफूलाई घर जान दिइयो ।

घटनामा स्थानीय राजबीर यादव, सुनिल साह, सोनु दास, प्रवीण दास, लभ यादव, राजेन्द्र महरा र विनय यादव सहितका युवाहरु रहेको पिडित विनिताको भनाई छ । ती आरोपितहरु मध्ये राजबीर यादव वडा अध्यक्षको साथीको नाती रहेको बुझिएको छ ।
उता वडा अध्यक्ष सहित टोलका आफूलाई ठूला भनाउनेहरुले विनिता र श्यामको घर परिवारलाई आरोपित युवाहरु पैसावाला र बदमास रहेको छ तिमी तिनीहरुसंग झमेला नलेउ भोलीका दिनमा केही हुन सक्ने भनी डराउंदै मिलापत्र गर्न दबाव दिइरहेको श्रोतको दाबी छ ।
साथै उनले भने बालविवाह गराएका युवकहरुको जीवन नै बर्बाद हुने भन्दै बालिका र परिवारसँग माफी माग्न लगाई घटनालाई वडाध्यक्ष सहित समाजक अगूवाहरुले दबाव सहितको आग्रह समेत गर्दै आएको छ ।
प्रहरी भन्छन : जाहेरी आए हामी अघि बढछौ
ईलाका प्रहरी कार्यालय रेल्वे स्टेशनका सई लेखनाथ खनालले आरोपितहरुलाई घटनाको केही समय पश्चात नै पक्राउ गरियौ, २४ घण्टासम्म हिरासतमा पनि राख्यौ तर केटा वा केटी कुनै पक्षबाट जाहेरी दिएन ।
त्यसपछि वडा अध्यक्ष यादव केही टोलवासीको समूहमा आई गाउँ समाजको इज्जत प्रतिष्ठको कुरा हो, हामी स्थानीय स्तरमै पंचायत गरेर मुद्दा सुल्झाउछौं भनी जमानतमा आरोपितहरुलाई छोडाएर लग्यो ।
उनले थप्दै भने जाहेरी नपरेपछि बिना वजह थुनामा राख्ने हाम्रो कुनै कानूनी अधिकार छैन, तर घटनाको भिडियो नै भाईरल भएपछि हामी सर्तक भएका छौं र उक्त कार्यमा संलग्नको खोजी कार्य जारी राखेको छौं ।
घटनाको भिडियो भाइरलले आजिज बनाएपछि पीडित दूबै परिवार घटनाको उजुरी दिनका लागि तयार भएपनि उजुरी आएपछि मात्रै आफूहरु पीडितको न्यायका लागि हरसम्भव प्रयास गर्ने सई खनालले समेत बताए ।

(संवेदनशीलताको अवस्थाले निज पिडीतहरुको अनुहार छोपिएको हो)