लोक सम्वाददाता
जनकपुरधाम, साउन २३ गते ।
राष्ट्रिय जनता पार्टी (राजपा) नेपाल अध्यक्ष मण्डलका सदस्य महन्थ ठाकुरका नाती (पोता) एवं सो पार्टीका नेता मनोज ठाकुर बैंकिग ठगी आरोपमा भारतमा पक्राउ परेका छन् ।
ठाकुर बैङ्क ठगीको आरोपमा भारतको उत्तर प्रदेशमा पक्राउ परेका हुन् । आफूलाई नेपाली रहेको दाबी गर्ने ठाकुर भारतको सितामढी जिल्ला निवासी रहेको भारतीय प्रहरीको दाबी छ ।
निर्वाचन आयोग नेपालले जारी गरेको प्रदेशसभा समानुपातिक उम्मेद्वारको सूचीमा महोत्तरीबाट क्रम संख्या १४९१ मा मनोजकुमार ठाकुरको मधेशी कोटाबाट नाम रहेको छ ।
भारतीय प्रहरीका अनुसार भारत विहार सीतामढी जिल्लाका मनोज ठाकुरसहित सञ्जय ठाकुर, अमिनेश ठाकुर र मुज्जफरपुरका अजित शर्मालाई उत्तर प्रदेशको स्पेशल टाक्सफोर्सले बुधबार पक्राउ गरेको हो । पक्राउ परेको मनोज, सञ्जय, अमिनेश दाजु–भाइ हुन् ।
ठाकुर विहार सीतामढी जिल्ला निवासी भएको तर उनको साथबाट नेपालसँग सम्बन्धित अन्य कागजात पनि फेला परेको प्रहरीले पुष्टि गरेको छ । मनोज, सञ्जय, अमिनेश तीनैजनासँग नेपाली नागरिकता छ । पक्राउ परेका चारैजना भारतको नोएडामा पहिलादेखि नै सक्रिय भएर बैङ्कको फर्जी कागज बनाउँदै ठगीमा संलग्न भएको भारतीय प्रहरीले जनाएको छ ।
उनीहरुले त्यहाँ एउटा नक्कली कम्पनी नै खोलेर कर्मचारी समेत राखेका थिए । त्यही कार्यालयका कर्मचारहरुका नाममा व्यक्तिगत, गाडी, घर लगायतका नाममा ऋण लिएर उनीहरु कार्यालयहरु बन्द गर्दै भाग्ने गरेको भारतीय प्रहरीको भनाई छ ।
प्रहरीको अनुसन्धान अनुसार भारतको आइसीआइसीआई बैङ्कबाट २ करोड र सिटी बैङ्कबाट १० लाख रुपैयाँ ऋण लिएको हो । ऋण लिएपछि उनीहरु फरार हुने गरेका थिए । ऋण लिएका बैङ्कले उनीहरुमाथि प्रहरीमा उजुरी हालेपछि यो पोल खुलेको हो ।
पक्राउपछि प्रहरीले गरेको अनुसन्धानबाट उनीहरुसँग ५६ वटा बैङ्कको खाता रहेको खुलेको छ । प्रहरीले अहिले सबै बैङ्कका खाता सीज गरेको छ । पक्राउ परेका उनीहरुको साथबाट प्रहरीले ६० हजार नेपाली रुपैयाँ बरामद गर्नुका साथै नेपाली पासपोर्ट र नेपाली नागरिकता बरामद गरेको छ ।
भारतीय सञ्चारमाध्यमका अनुसार उनीहरुको साथबाट ४२ वटा पीन कार्ड, ८ आधार कार्ड, २४ भोटर कार्ड, ५६ डेबिट कार्ड, ५६ क्रेडिटकार्ड, २१ वटा बैङ्कका पासबुक, ४४ वटा चेकबुक विभिन्न सरकारी तथा बैङ्कका नक्कली स्ट्याम्प समेत फेला पारेको छ ।
मनोज ठाकुर एक डेढ महिनाअघिसम्म जनकपुरमै थिए । प्रदेश २ का विभिन्न मन्त्रालयमा गएर ठेक्कापट्टाको काम मिलाइदिन दबाब दिँदै आइरहेको प्रदेश २ का एक मन्त्री बताउँछन् ।
राजपाकी नेतृ एवं प्रदेश सभा २ का सदस्य रानी शर्मा तिवारीले एक संचार माध्यमसंग कुरा गर्दै मनोज महोत्तरी एकरहियाको वासिन्दा हुन् । चुनावको समयमा आफू मनोजको घरमा पनि गएको छु तर भारतमा उनको व्यवसायबारे थाहा छैन । उनले थप्दै भनिन ‘मनोजले महन्थ ठाकुरलाई हजुरबुवा भन्थ्यो । पार्टी भित्र उनले आफूलाई महन्थ ठाकुरज्यू नजिकको मान्छे भनेर चिनाउंछन ।
श्रोतका अनुसार महन्थ ठाकुर स्वास्थ्य उपचारका लागि दिल्ली जाँदा उनको रेखदेख गर्ने काम मनोज ठाकुरले नै गर्ने गर्छ । महन्थ ठाकुर मात्र होइन, राजपा नेपालका जुनसुकै शीर्ष नेता दिल्ली पुग्दा मनोज ठाकुरको उपस्थिति त्यहाँ हुन्छ । यसअघि उनी राजपा नेपाल निकट प्रवासी संघ (भारत) का अध्यक्ष पनि थिए ।
यो विषयमा आफ्नो प्रतिक्रिया दिनुहोस् !