सञ्चार मन्त्री बाँसकोटा भन्छन : राजेन्द्र महतो को हुन ?

लोक सम्वाददाता
जनकपुरधाम, साउन २१ गते ।
गत दुई दिनअघि संघीय सरकारले ८ जनाको नागरिकता खारेज गरेको सम्बन्धमा सूचना, संचार तथा सूचना प्रविधि मन्त्री गोकुल बाँसकोटाले राजेन्द्र महतो को हुन भन्ने प्रतिप्रश्न गरेका छन् ।
मंगलवार जनकपुरधाममा आयोजित पत्रकार सम्मेलनमा पत्रकारहरुले सरकारले प्रष्ट नपारेको कारण नागरिकता खारेज सम्बन्धी घटनामा प्रतिनिधि सभा सांसद एवं राजपा अध्यक्ष मण्डलका सदस्य राजेन्द्र महतोलाई बदनाम गरिएको राखेको जिज्ञासामा राजेन्द्र महतो को हुन, सरकारले माननीय भनेको त छैन, धेरै राजेन्द्र महतो हुन सक्छ यसमा सरकारको के दोष भने ।
उनले भने सरकारको काम सूचना दिने तर को छ कहाँको छ भन्ने तिन पुस्ते तथ्यांक सरकार प्रवक्तालाई दिनुपर्ने जरुरी छैन, त्यो त सम्बन्धित मन्त्रालय वा निकायसँग जानकारी लिन सकिन्छ । राजेन्द्र महतो को हो चिन्दिन म, जसले फर्जी तरिकाबाट गलत कागजात दिएर नागरिकता लिएको थियो, त्यसको नागरिकता खारिज गरियो, को हो कहाँको हो भन्ने रेकर्ड राख्ने काम हाम्रो होइन ।
एक अर्को प्रसंगमा उनले संविधानप्रति कुनै कुरामा औचित्य पुष्टी भए मात्रै संशोधन हुने बताए । उनले भने वर्तमान संविधान अहिलसम्मकै सबैभन्दा उत्कृष्ट संविधान रहेको भन्दै कुनै धारा उपधारामा त्रुटि छ भने संशोधनको समय, आवश्यक्ता र औचित्य पुष्टी भए मात्रै संशोधन गरिने बताए ।
साथै उनले तीन वटै तहका सरकारलाई आ आफ्नो अधिकारको काम जिम्मेवारीपुर्वक सम्पन्न गर्नुपर्छ तर प्रदेश २ सरकार एक स्टेप अगाडि बढन खोजेको आरोप मन्त्री बास्कोटाले लगाए ।
पत्रकारहरुको जिज्ञासामा सरकारका प्रवक्ता समेत रहेका मन्त्री वास्कोटाले नेपाल सरकारका लागि विकास प्राथमिकतामा रहेको बताउंदै बजेटको समयमै सदुपयोग गर्ने वाध्यात्मक व्यवस्था रहेकोले यस वर्षबाट विकास निर्माणका कार्यहरुले गति लिने विश्वास व्यक्त गरे ।
उनले प्रदेश दुईमा नेपाल रेल्वे, निजगढ अन्तर्रा्ष्ट्रिय विमान स्थल, कमला मरिन डाइभर्सन, मदन भण्डारी राज्यमार्ग, कोशी करिडोर, नारायणी करिडोर लगायतका परियोजनाहरु संचालनमा ल्याएको जानकारी दिए ।