हंसपुर नपामा प्रमुख उपप्रमुखको विवाद उग्र, छुट्टा छुट्टै कार्यालय संचालन

लोक सम्वाददाता
जनकपुरधाम, साउन १२ गते ।
धनुषाको हंसपुर नगरपालिकामा प्रमुख र उपप्रमुखबीचको विवाद उत्कर्षमा पुगेको छ । विवाद यति हदसम्म बढेको छ दुवैले छुट्टा छुट्टै कार्यालय संचालन गर्न थालेका छन् ।
निर्वाचन पश्चात पदीय भार ग्रहण बेलादेखि नै प्रमुख रामज्ञान मण्डल र उपप्रमुख रेणु यादवबीच आ आफ्नो अधिकारका लागि एकअर्कालाई आरोप लगाउंदै विवाद गर्दै आएका छन् । कहिले बजेट बाँडफाँड, त कहिले नगरपालिका कार्यालय सार्ने लगायतका विषयमा प्रमुख उपप्रमुख बिच विवाद हुंदै आएको हो । अब विवाद यति हदसम्म बढयो कि एउटै नपाको दुईटा कार्यालय संचालन गर्न थालेका छन् ।
प्रमुख मण्डलले उपप्रमुख संगको विवादका कारण केही दिन यतादेखि हँसपुरको बेल्ही चोकबाट कार्यालय सञ्चालन गरि रहेका छन् भने उपप्रमुख झा बघचौडास्थित साविककै कार्यालयमा बसेर कार्यसम्पादन गर्दै आइरहेकी छन् । उपप्रमुख झाको घर पनि बघचौडामै रहेको छ ।
कार्यालय बेल्ही चोकमा लगिए पनि त्यहाँ नगरपालिकाको कुनै बोर्ड राखिएको छैन । बोर्ड बघचौडास्थित नगरपालिकाको साविककै कार्यालयमै रहेको छ ।
नगरप्रमुख मण्डलले बहुमतबाट निर्णय गरेर गत साउन ३ गतेदेखि नगरपालिकाको कार्यालय बेल्ही चोकमा संचालनमा ल्याएको बताएका छन् । तर नगरपालिकाको कार्यालय जबरदस्ती प्रमुख मण्डलले सारेको उपप्रमुख झाले आरोप लगाइन् ।
उपप्रमुख झाले भनिन्, ‘बहुमतको आधारमा कानूनसम्मत कार्यालय सारेको भए राती किन सार्नुभयो ? दिउँसै सारे हुन्थ्यो नि ?’ प्रमुख मण्डलले तानाशाही प्रवृति देखाएको उपप्रमुख झाको भनाई थियो ।
यता प्रमुख मण्डलले आफूहरूले सेवाग्राहीको सुविधालाई ध्यानमा राखेर बेल्ही चोकमा कार्यालय सञ्चालनमा ल्याएको प्रतिक्रिया दिए । साविकको कार्यालयमा ठाउँ अपुग भएपछि बेल्ही चोकमा कार्यालय सार्नुपरेको उनको भनाई छ ।
उपप्रमुख झा साविककै कार्यालयमा बस्दै आइरहे पनि नगरपालिकाको सम्पूर्ण कर्मचारी भने नयाँ सारिएको कार्यालयमा बसेर काम गर्दै आइरहेको पाइएको छ ।
प्रमुख मण्डलकै निर्देशनमा सबै कर्मचारी बेल्ही चोकमा सारिएको कार्यालयमा बस्दै आएको उपप्रमुख झाको आरोप छ । बघचौडामा कार्यालय हुँदा उनलाई मनोमानी गर्न समस्या थियो । त्यसैले कानुन मिचेर अन्यत्र कार्यालय सारेका हुन,’ उपप्रमुख झाले बताइन् ।
दुवैको विवादले कार्यालय दुई ठाउँमा भएपनि कर्मचारीहरु बेलहीकै कार्यालयमा काम गर्दै आएको छ भने सेवाग्राहीलाई काम गराउन निकै सास्ती भोग्नु परिरहेको छ ।