बाढी निरिक्षणको नाममा करोडौ रुपैया हातपार्ने सांसदहरुको खेल

लोक सम्वाददाता
जनकपुरधाम, साउन ५ गते ।
तराई मधेशमा आएको बाढीबाट क्षति तथा अवस्था बारे निरिक्षणका लागि प्रतिनिधि सभाको राज्य व्यवस्था तथा सुशासन समिति अन्तर्गत गठित बाढी प्रभावित क्षेत्रको निरिक्षण एवं भ्रमण उपसमितिले प्रदेश २ मा निरिक्षणको नाममा नौटकी गरेका छन् ।
प्रदेश २ का ८ वटै जिल्लामा बाढी प्रभावित क्षेत्रको निरीक्षणका लागि सांसद रामसहाय प्रसाद यादवको नेतृत्वमा गठित उपसमितिले निरिक्षण गर्न प्रदेशका राजधानी जनकपुरधाम पुगेका टोलीले धनुषा जिल्लाका बाढीबाट अति प्रभावित क्षेत्रको अनुगमन नै नगरी फर्केका छन् ।
धनुषा जिल्लामा बाढीबाट अति प्रभावित संकटग्रस्त क्षेत्रको रुपमा घोषित कमला नगरपालिका, जनकनन्दनी गाउँपालिका र मुखियापट्टी मुसहरनिया गाउँपालिकाको निरिक्षण नगरी सुगम क्षेत्र जनकपुरधामका केही वडामा विपत तथा व्यवस्थापन समितिद्वारा उपलब्ध गराइएको राहत सामाग्री वितरण गरी अर्को जिल्ला फर्केका छन् ।
सो उपसमितिले जनकपुरधामका वडा नं. १ र ७ मा मात्र केही राहत सामाग्री वितरण गरी वास्तविक प्रभावित क्षेत्रको अवस्था हेर्न नगई लामो राजनीतिक भाषण गरी फर्केको प्रति स्थानीय आक्रोशित भएका छन् । उनीहरुले उपसमितिले निरिक्षणको नाममा भत्ता पकाउन उपसमितिले नौटकी गरेको भनेर आक्रोश व्यक्त गरेका छन् ।
निरीक्षणमा आएका राजपा अध्यक्षमण्डलका सदस्य राजेन्द्र महतोले बाढी पीडितको पुनस्र्थापनाका लागि सरकारले तत्कालै निर्णय लिनु अवश्यक रहेको बताउंदै बाढीले बगाएका घरहरुको अविलम्ब निर्माण गर्नु आवश्यक रहेको पनि उनले बताए ।
प्रमुख जिल्ला अधिकारी प्रदीपराज कणेलले धनुषामा ११ हजार मानिस बाढीबाट प्रभावित भएको र राहत अपुग भएको जानकारी टोलीलाई गराएका थिए । क्षतिको पूर्ण विवरण अझै संकलन नभएको उनले जानकारी गराएको थियो ।
गठित उपसमितिको एक टोलीले धनुषा, महोत्तरी, सर्लाही, रौतहट, बारा र पर्साको बाढी प्रभावित क्षेत्रको निरिक्षण गर्ने भनिएको छ तर सो टोलीले प्रभावित क्षेत्रको अनुगमन नै नगरी फर्केका छन् ।
उपसमितिले प्रदेश नम्बर २ को ८ वटै जिल्लामा बाढी भएको क्षति र अवस्थाको स्थलगत निरीक्षण गरी सरकारलाई प्रतिवेदन बुझाउने जिम्मेवारी पाएको छ । तर वास्तविक प्रभावित क्षेत्रको निरिक्षण नै कस्तो प्रतिवेदन बनाइने हो भन्ने करा शनिवार टोलीले निरिक्षणको नाममा गरेको नौटंकीले प्रष्ट हुन्छ । सांसदहरुको ती क्रियाकलापले भत्ता र भ्रमणको नाममा करोडौ रुपैया हतियाउने कार्य मात्र देखिएको हो ।
सांसदहरुको टोलीमा रामसहाय प्रसाद यादव, राजेन्द्र महतो, देवेन्द्रप्रसाद कँडेल, लक्ष्मी चौधरी, दिलेन्द्र प्रसाद बडु, डिला संग्रौला, छक्क बहादुर लामा, बृजेश कुमार गुप्ता लगायतका रहेका छन् ।