अव्यवहारिक करको विरोधमा व्यवसायीहरुले निकाले जुलुस

लोक सम्वाददाता
जनकपुरधाम, साउन ४ गते ।
संघीय सरकारले चालू आर्थिकको साउन १ गतेदेख नै लागू गरेको कर नितीको विरोधमा जनकपुरधामका व्यापारीहरुले विरोध जुलुस प्रदर्शन गरेका छन् ।
व्यवसायीहरुको छाता संगठन जनकपुर उद्योग वाणिज्य संघको अगुवाई संघको प्रांगणबाट निस्केको सो विरोध जुलुसमा दर्जनौ व्यवसायीहरुको सहभागिता रहेको छ । सो विरोध जुलुस नगरको विभिन्न भागको परिक्रमा गर्दै पुनः संघमै पुगेर कोण सभामा परिणत भई सम्पन्न भएको छ ।
सरकारले लागू गरेको अव्यवहारिक कर खारेज, श्रमिकमाथि लगाइएको कर खारेज, ट्रान्सपोर्ट लगायत उद्योग व्यवसायमा लागू गरिएको चर्को कर खारेज गर्न मांग सहितका प्लेकार्ड विरोध जुलुसमा सहभागी व्यवसायीहरुले बाकेका थिए ।
व्यवासयीलाई मार्का पर्ने गरी सरकारले ल्याएको कर ऐन, नीति, तथा कानुनले निजी क्षेत्रमा अन्यौलता सिर्जना गरेको भन्दै जनकपुर उद्योग वाणिज्य संघले विरोध गरेको संघका अध्यक्ष ललित साहले बताए ।
उनले भने सरकारले आम जनता र व्यवसायीको ढाड सेक्ने गरी श्रमिक, उद्योगी, ट्रान्सपोर्ट, विभिन्न मालसमान लगायतका कुरामा लागू गरेको करले उद्योग व्यवसाय नै धारासायी हुनेछ ।
नेपाल सरकारले घोषणा गरेको “समृद्ध नेपाल सुखी नेपाली” नारालाई सार्थक तुल्याउने प्रमुख संयन्त्रको रुपमा रहेका निजी क्षेत्रलाई खुल्ला एवं सहज वातावरण निर्माण गरी राष्ट्रिय अर्थतन्त्र गतिशील नबनाएर अव्यवहारिक कर लागू लागू गरेर उद्योग व्यवसायलाई धारासायी बनाउन खाजिएको व्यवसायीहरुको आरोप छ ।
गत एक महिनादेखि आर्थिक विधेयक २०७६ को विरोधमा आन्दोलनरत जउवा संघले यसअघि जिल्ला प्रशाशन कार्यालय, आंतरिक राजस्व कार्यालय लगायतको स्थानमा ज्ञापन पत्र बुझाइ सकेको छ ।