लोक सम्वाददाता
जनकपुरधाम, असार ३१ गते ।
समयमा निर्माण कार्य सम्पन्न गर्न नसकेका आफ्ना पार्टीको ठेकेदार नेता र सांसदलाई कारवाही गर्ने भन्ने प्रश्नमा उद्योग वाणिज्य तथा आपूर्ति मन्त्री मातृका यादवले पत्रकारहरुमाथि नै जाइलागे ।
बाढी पिडीतको अवस्था हेर्न आफ्ना गृह जिल्ला धनुषा आएका मन्त्री यादवले मंगलवार आयोजित पत्रकार सम्मेलनमा पत्रकारहरुले तपाईकै पार्टीका नेता र सांसदले ठेक्का लिएको सडक र पुल पुलेसा समयमा निर्माण समयमा सम्पन्न गर्न नसकेको जिज्ञासामा उनले कारवाही गर्ने वा नगर्ने जवाफ दिनुको सट्टा उल्टै पत्रकारहरुमाथि नै जाई लागे ।
मन्त्री यादवले पत्रकारहरुलाई भने तपाईहरुलाई मात्र मेरै पार्टी नजर आइरहेछ तपाई आफ्नो पार्टीका ठेकेदारलाई के भन्नु हुन्छ तिनीहरुलाई कसले कारवाही गर्ने भनी जाइलागेपछि पत्रकारहरुले जवाफ दिन दबाव दिएपछि अन्ततः उनले बाढी जस्ता प्राकृतिक प्रकोपको भयावह स्थिति समयमा निर्माण कार्य नगरी स्थिति ल्याउने जुनसुकै ठेकेदारलाई कारवाही गर्ने प्रतिबद्धता जनाए ।
संघीय सरकारका नेतृत्वकर्ता नेपाल कम्युनिष्ट पार्टीका प्रदेश सभा सांसद कमल साह किशोरी कमल निर्माण सेवा संचालक रहेका छन भने रमण कन्स्टक्सनका संचालक बलराम महतो पार्टीका नेता रहेका छन् ।
रमण कन्स्टक्सन निर्माण कम्पनीले हुलाकी राजमार्गका सम्पूर्ण ठेक्का सहित प्रदेश २ का दर्जनौ निर्माण ठेक्का हत्याएका छन् र त्यसका अधिकांश काम कमल निर्माण सेवाले पेटी ठेक्काको रुपमा गर्दै आएको छ । तर कुनै पनि ठेक्काको निर्माण कार्य समयमा सम्पन्न गरिएको छैन । कमल निर्माण सेवाले पेटी ठेक्का लिएको जनकपुर यदुकोहा सडक खण्डको निर्माण कार्य समयमा सम्पन्न हुन नसक्दा करीब आधा दर्जन पालिका बाढी प्रभावित भएका छन् ।
त्यस्तै जनकपुर भिट्ठामोड सडक खण्ड ठेक्का लिएको रमण कन्स्ट्रक्सनले पनि समयमा निर्माण कार्य पुरा गर्न नसकेको कारण महोत्तरीको पिपरामा माटो पुरिएको सडक नै बग्दा दर्जनौ गाउँ डुबानमा परेको छ । दुवै सडकको २५ प्रतिशत पनि काम हुन सकेको छैन ।
साथै बाढीको प्रमुख कारण दिनानुदिन भइरहेको चुरे दोहन र कटान रोक्न सरकार असफल रहेको भन्ने जिज्ञासामा समेत मन्त्री यादवले केही बोलेन । उनले भने यसमा म केही भन्न चाहन्न, पत्रकारहरुले पटक पटक प्रश्न दोहरयाउंदा पनि उनले सरकारको कमी कमजोरी बारे मुख खोल्न चाहेन ।
अर्को प्रसंगमा मन्त्री यादवे बाढी पिडीतलाई सबैले आ आफ्नो स्तरबाट सहयोग गर्न आग्रह गर्दै सहयोगका लागि संघीय सरकार गम्भीर भई काम गरिरहेको जानकारी दिए ।
यो विषयमा आफ्नो प्रतिक्रिया दिनुहोस् !