लोक सम्वाददाता
जनकपुरधाम, असार १९ गते ।
धनुषाको नगराइन नगरपालिकाको नाम परिवर्तनको विषयमा पटक पटक हुंदै आएको विवाद सिमामा पुगेको छ ।
पालिकाको नाम परिवर्तनको विषयलाई लिएर चौथो नगर सभा समेत विवादित बन्दै गएको छ । असार १० गतेका लागि बोलाइएको नगर सभा बिहीवार १९ गते पनि हुन सकेको छैन ।
नगर प्रमुख प्रमेश्वर यादबले काँग्रेस उपसभापति बिमलेन्द्र निधीका बुवा स्वर्गिय महेन्द्र नारायण निधीको नाममा नगरपालिकाको नामाकरण गर्ने प्रस्ताव गरेपछि नगरसभा विवादित बन्न पुगेको हो । नगरपालिकाको नाम परिवर्तनका लागि बहुमत पुर्याउन नगर प्रमुख यादवले अन्तिम समयसम्म प्रयास गरेपनि असफल सावित भए ।
नगरसभाको अर्को बैठक असार २४ गते गर्ने निर्णय गरिएको पमुख यादवले जानकारी दिए । नेपाली काँग्रेसबाट निर्वा्चित प्रमुख यादबले नगरपालिकाको नाम परिवर्तन गर्ने विषय गम्भिर रहेकाले छलफल गरी मात्र निर्णय लिने भनेर बैठक सारेको बताए । तर नेकपा र समाजवादी पार्टीबाट निर्वा्चित जनप्रतिनिधिहरुले बहुमत नपुग्दा बैठक सारेको आरोप लगाएका छन् ।
नगराइन नगरपालिकामा कुल ५९ कार्यपालिका सदस्य रहेको दुई तिहाई बहुमत पुगेपछि मात्रै नाम परिवर्तन गर्न पाउने छ तर मात्र २९ जना पुगेको छ जुन कांग्रेसबाट नै हुन । नाम परिवर्तनका लागि ५ जना थप चाहिन्छ । ५ जना नेकपा र समाजवादी पार्टीका जनप्रतिनिधि सहमती नभए प्रस्ताव पास हुँदैन ।
नगर प्रमुख यादव प्रजातन्त्रका लागि महेन्द्र नारायण निधीको ठूलो योगदान रहेको र एउटा विभुती नै भएकोले सम्मानका लागि उनको नामबाट नगरपालिकाको नामाकरण पक्षमा छन भने नेकपा र समाजवादी पार्टीका जनप्रतिनिधहरुले शहिद दुर्गानन्द झा वा अन्य शहिदको नामबाट नगरपालिकाको नामाकरण गर्दा मात्र सहमती जनाउने भन्दै आएको छ ।
महेन्द्र नारायण निधीको नामबाट नगरपालिकाको नामाकरण गर्दा कुनै पनि हालतमा स्वीकार नगर्ने र आन्दोलनमा उत्रने चेतावनी उनीहरुको छ । गत वर्ष पनि प्रमुख यादबले नगरपालिकाको नाम महेन्द्र नारायण निधी राख्ने प्रयास गर्दा नगरपालिकाको कामकाज ४ महिनासम्म ठप्प नै भएको थियो ।
यो विषयमा आफ्नो प्रतिक्रिया दिनुहोस् !